Cun la deliberaziun dla Junta provinziala da en lönesc, ai 12 de dezëmber 2005, él gnü metü la pera de fondamënta por realisé la zirconvalaziun dl paîsc de Longega. “Chësc é indô n ater vare important por la Val Badia” à dit l’assessur Mussner. Les carateristiches tecniches é gnüdes aprovades y i laûrs dess bele mëte man da d’aisciöda dl 2006.

Do ch’al é gnü daurì al trafich le pröm tòch dla strada dla Val Badia nöia dan da zacotan de dis à la Junta provinziala, sön domanda dl assessur provinzial Florian Mussner, fat n ater vare de importanza por le trafich sön la strada dla Val Badia tl dagnì. “I ùn determiné les carateristiches tecniches dla zirconvalaziun de Longega por tó y jì n iade por dagnora chël tòch de strada strënt fora por paîsc” à dit Mussner.  

N pröm vare tl vers de na realisaziun dla zirconvalaziun é gnü fat cun n stüde de fatibilité che odô danfora döes variantes poscibles. “I ti ùn presentè trames les variantes al comun de Mareo y les ùn tratades deboriada cun i rapresentanć de comun” à splighé l’assessur Mussner. Sides le comun che inće les assoziaziuns turistiches é rovades a öna sön chë trassa che é spo inće gnüda aprovada dala Junta provinziala. “I ùn ma messü fà n valgönes pices mudaziuns por ademplì les prescriziuns dl Ofize por la sistemaziun di rüs da munt” à prezisé Mussner.  

La trassa nöia de indöt 730 metri de lunghëza che é gnüda aprovada ti jarà do, tan inant ch’al é poscibl, ala strada bele esistënta. Insciö pol gnì sparagné grunt che vëgn adorè cun prescia por amplié la zona industriala. Al gnarà realisé na zirconvalaziun cun trëi punć y na torona che arà n diameter de 38 metri. Sc’an ti ćiara ala cherta gnarà chësta fata sö sön la spona a man ciampa dla Gran Ega. Por mëte a livel le grunt tl raiun dla torona gnaràl adorè le material ćiavè fora dal areal de costruziun de “Punt de Fer”.  “Cun i laûrs de spostamënt de material gnaràl bele metü man da d’aisciöda” à impormetü Mussner.  

I dui punć de respetivamënter 50 y 57 metri conliarà la zirconvalaziun a Al Plan de Mareo y al’Alta Badia y n terzo punt de 55 metri fajarà da conliamënt cun le tòch nü dla strada dla Val Badia. Rina jarà da arjunje tres la strada bele esistënta.

UV