Jonta anjinia zëntri spezialisei dl tumor te cater spediei (cun audio)

01/28/2013, 3:01 PM

USP – Aldò dla diretives stateles possel me unì njenià zëntri spezialisei per l tratamënt de tumores, sce l spedel à amaca cin repartizions che trata chësta malatia. La Jonta provinziela à (NCUEI) ai 28 de jené dat pro de junté de tel repartizions ti spediei a na maniera che a Burnech, Persenon, Bulsan y Maran giaten la zertificazion de zënter spezialisà per tumores.

Oprazions de tumor unirà pitedes te cater spediei spezialisei dl Südtirol
Oprazions de tumor unirà pitedes te cater spediei spezialisei dl Südtirol

La diretives dl Stat se stiza sun l prinzip che ntervënc tan zities sciche chëi per l tumor dëssa me unì pitei te zëntri ulache l ie la njinies aldò y ulache i dutores a na gran pratica te chësta sort de oprazions. Tl Südtirol morel 1400 persones al ann de tumor. La Jonta provinziela à dat pro de junté na repartizion tl spedel de Persenon acioche l posse a chësta maniera unì pità duc i tratamënc che reverda l'urologia. A Burnech uniral juntà trëi repartizions nueves. A Bulsan y Maran puderal unì pità ntervënc per feter duta la sortes de tumor. Davia che i spediei de Sulaneres/Schlanders y de San Ciana/Innichen ne à nia i la strutura y la cumpëida de ntervënc, ne puderai nia giapé la zertificazion.

"La diretiva di zëntri spezialisei reverda me i ntervënc. La diagnosa y dopro la cures puderà unì fates te duc i spediei" à spiegà l presidënt Luis Durnwalder do la senteda dla Jonta. Sun la basa de statistiches dëssel vester testemunià che de 20% di amalei de tumor ie unic salvei te zëntri spezialisei ulache i dutores à na gran pratica. La Jonta provinziela à cun la dezijion de anjenië ite zëntri spezialisei te cater spediei fat a na maniera che l posse unì pità l miëur servisc per amalei de tumor, nce sce per uni un ne ie chësc nia tl spedel plu daujin.

as