Chëst ann degun daz sun l Stelvio

05/13/2013, 3:07 PM

L daz udù dant per la streda dl jëuf dl Stelvio/Stilfs ne unirà chëst ann nia tëut ite. Chësc ie (NCUEI) ai 13 de mei unì fat ora dala Jonta provinziela davia che l ie mo melsegurëzes giuridiches y de carater urganisatif. Tan giut che la cuestions ne ie nia stlarides, ne al – aldò dl presidënt Durnwalder – degun bert a scumencé cun l daz sun l Stelvio.

La streda dl jëuf de Stelvio, una dla plu spetaculeres dl’Elpes, resta chëst ann zënza daz (foto USP).
La streda dl jëuf de Stelvio, una dla plu spetaculeres dl’Elpes, resta chëst ann zënza daz (foto USP).

Te chësc mumënt lëura l Servisc provinziel per la stredes dassënn per libré la streda dl jëuf de Stelvio per l Giro d'Italia. I lëures de manutenzion per la streda alpina ëssa da chëst ann dassù unì finanziei tres n daz, ma la Jonta provinziela à śën spënt la ntroduzion de chësc daz. L presidënt dla Provinzia Durnwalder à tla cunferënza stampa do la senteda dla Jonta spiegà che l ie mo dificulteies giuridiches cun la provinzies ujines y de carater urganisatif che muessa unì ressoltes dan scumencé a tò ite n daz. "Ne ulon nia resië y perchël ne saral chëst ann mo nia da paië per se nuzé dla streda".

La dezijion de mascima sun l daz per la streda dl jëuf de Stelvio ova la Jonta provinziela bele tëut l ann passà d'instà. Per la streda sëura Trafoi dëssel unì metù a jì n daz y cun la ntredes possel unì finanzià l mantenimënt y pruvedimënc de revalutazion culturela y ecologica dla streda. (USP)

as