"Ert x Merit Ladin": Christine Runggaldier vënc la edizion 2026  

Cuncors artistich "Ert x Merit Ladin": premià l pruiet "Deventé" dl’artista Christine Runggaldier

BULSAN (USP). La iuria à sentenzià chiche à venciù. Tl cheder dl cuncors artistich "Ert x Merit Ladin", metù a jì per ulentà y urganisazion dl Südtiroler Künstlerbund n cunlaurazion cun la Direzion provinziela de Furmazion y de Cultura Ladina, fòvel unì dat ite opres de undesc artistes y artisć dla Ladinia.

La dezijion n con’ de chiche ëssa pona venciù ie unida tëuta da na iuria, metuda adum da Aron Demetz, presidënt dla lia La Vëta, da Raimund Gross dl “Südtiroler Künstlerbund”, dala artista Wilma Kammerer, da Katharina Moling diretëura dl Museum Ladin y da Iaco Rigo presidënt dl EPL – Ert por i Ladins, che à premià l pruiet "Deventé" dl’artista Christine Runggaldier.

La particularità dl lëur premià ie te si carater de "Opra de si Devenì": L ne se trata nia de na criazion bele stluta ju, l ie plucheauter n pruiet artistich mo da realisé che unirà prejentà ala iuria tres na reprejentazion grafica. Tl cuncors, da coche l fova unì scrit ora, fòvel unì dit che n ne possa nia mé fé pea cun lëures bele realisei, ma nce cun pruiec che ie mo tla fasa de svilup.

L’artista che à venciù, Christine Runggaldier, ie nasciuda tl 1988, viv y lëura te Sëlva, te Gherdëina. La à studià tl’Academia d’Ert Figurativa a Unieja y tla Università per Ert Aplicheda de Viena, ulache la à abù l mesun de jì plu sot te si cualiteies y cumpetënzes tl depënjer y te chëles da scultëura. La ie śën iusta tl lëur de jì inant sun si troi artistich, se cunzentran sun la scultura. Oradechël féjela pea pra mostres y nce pra pruiec interdisziplineres.

L assessëur provinziel Daniel Alfreider à sotrissà: "L ie na gran legrëza a pudëi premië na artista ladina che à si ravises te si ncësa y che ie da iló pieda via per na furmazion artistica mpurtanta a Unieja y a Viena, per pudëi pona ala fin dla finedes se tò pea la esperienzes, la cumpetënzes y la sensiblteies che la se à fat a livel nternaziunel per les purté inò de reviers te si ncësa."

L diretëur dla Direzion Ladina dla Furmazion y Cultura, André Comploi: "Son scialdi cuntënt che l ie, cun Christine Runggaldier, unì cris ora na artista ladina dla generazion plu jëuna – y chësc cun n pruiet nteressant, che ie unì fat tla reflescion y cun cuscienza per l Merit Ladin y chiche ëssa pona venciù l cuncors. La dezijion dla iuria ie n bel senial de giaurida de viers de formes artistiches esprescives cuntempuranes y per l sustëni de jëunes y de jëuni dla Ladinia che se muev cun si criazions tl ciamp dl’ert."

"Ert ladina se svilupea al didancuei te na maniera naturela y azeteda da duc, danter la identità raiunela y l barat nternaziunel, tla tradizion y tl svilup. Propi te chësc pensier y manejamënt de viers dl daunì iel laite l cunzet de Ert x Merit Ladin," da coche à dit Alexander Zoeggeler, presidënt dl Südtiroler Künstlerbund.

L lëur che à venciù unirà prejentà, spiegà y unerà n ucajion dla zeremonia de premiazion dl Merit Ladin ntan l Di dla Cultura Ladina ai 19 de setëmber dl 2026.

Cun l Pest "Merit Ladin" vëniel unerà na persunalità speziela, che porta pro, cun si lëur y si criatività, a renfurzé la identità ladina y si nfluënza tla cumenanza ladina y nce sëura la realtà de chësta ora.

Tl 2026 uniràl nce unirà l ex-ntendënt scolastich Franz Vittur, che ova judà pea te n mumënt dezijif a mëter la fundamëntes per l sistem de scola ladin coche l ie al didancuei, judan pea a l fé svilupé do y do, cun la fazion de renfurzé nscila te manieres desferëntes y te plu ciamps la rujeneda y cultura ladina.