Festa de cumià 2021: 15 maestri y maestres che va n pension

Ai 31 de agost iel unì a se le dé la festa de cumià per 15 nseniantes y nsenianc che va n pension. Insam, Comploj y Frontull lascia l’Intendënza.

Ai 31 de agost ie per truep nsenianc y nseniantes l ultim di de na vita dedicheda ala scola, ala scolina y al sistem scolastich ladin. Na ucajion per rengrazië per l lëur, l mpëni  y la pascion da pert dl Assessëur Daniel Alfreider, dla Intendënta Edith Ploner y de duc y duta la diretëures dla scoles ladines.

Per l Assessëur Alfreider iel dantaldut la persones che mplenësc l mond dla scola ladina cun vita. “L ie perchël n gran plajëi pudëi rengrazië la persones che à cuntribuì de svilupé inant la scola ladina cun si lëur, idealism y mpëni. Dantaldut la perioda dl coronavirus nes à mustrà tan mportant che la furmazion y l educazion ie y ce rodul fundamentel che la nseniantes y i nsenianc à te nosta sozietà”, à dit Alfreider.

Nce la Intendënta Ploner à sotrissà che “l ie mpurtant che la persones che lascia l nseniamënt o la ncëria tla Intendënza ladina resta liedes al ambient scolastich y l sustënies inant. Te n pitl sistem sciche chël ladin iel da lauré deplù per l tenì n pe y l svilupé inant."

L’ancunteda de cumià ie unita fata chëst ann a San Martin de Tor, tl self dl Istitut Ladin Micurá de Rü, dala 4 domesdì.

Cun chëst ann jirà n pension 4 maestres dla scolina (Monica Schenk, Roswitha Tomasini, Cecilia Clara y Irene Canins) y si diretëura Hannelore Insam, 7 nsenianc y nseniantes dla direzions raioneles (Monica Castlunger, Maria Rita Mitterrutzner, Michaela Sotriffer, Giuseppe Agreiter, Giacomo Frontull, Rosamunde Irsara, Ulrika Mauroner), 2 dla scoles autes (Thea Blaas y Susanna Kostner). Danter chisc iel l ispetëur de religion Giacomo Frontull y per la pert di Servijes dla Intendënza iel Carla Comploj che lascia si ncëria de ispetëura per la inclujion.

L diretëur Heinz Videsott à menà tres la festa y la Scola de Mujiga de Badia à dat legrëza cun si mujiga.