Garantí abitaziuns che la popolaziun dles valades pó se pormëte

Govern provinzial ti raiuns (4/5): l'assessuria provinziala Ullli Mair fej referimënt ales poscibilités dla reforma

SAN MARTIN DE TOR (LPA). I cosc' che aumënta tres deplü por le terac da frabiché y le vire cer rapresentëia ince tles valades ladines na gran indesfidada, dantadöt por families y jënt jona. Tl cheder dla sentada dl govern provinzial tignida tl Museum Ladin a San Martin de Tor él gnü debatü tl menü sön chësc argomënt. L'assessuria provinziala responsabla por les abitaziuns Ulli Mair á fat referimënt ales poscibilités nöies, che é gnüdes cheriades cun la reforma dles abitaziuns dl 2025, dantadöt ales frabiches da afité d'interes publich y les abitaziuns cun n lian sön le prisc.

Ti garantí n raiun de abitaziun che ares pó se pormëte ince ales generaziuns che vëgn docá tla Val Badia y te Gherdëna ê un di azënc dla sentada dl govern provinzial fata adöm cun i ombolc di comuns ladins. Prisc de bëgns imobiliars alc, püch terac da frabiché y l'afit turistich smendrësc tres deplü le raiun de abitaziun por la jënt dl post. Les novités y i adatamënc por la sovenziun dles ciases de abitaziun mostra bele faziun - mo les sovenziuns sores ne basta nia, por arbassé i cosc' de costruziun y insciö ince i prisc dles abitaziuns, á recordé l'assessuria provinziala Mair. Ai comuns ti spetel le dovëi dezisif, da cherié les condiziuns da dé ia terac da frabiché por raiuns abitatifs nüs por la popolaziun locala. "I nes adorun un cun l'ater, por druché düc i botuns" á dit l'assessuria provinziala Mair. La Provinzia a cherié les condiziuns de cornisc, sëgn él ince i comuns che mëss fá süa pert, por fá pié ia y mëte a jí proiec, á constaté l'ombolt da La Val Felix Nagler, en rapresentanza di comuns dles valades ladines ala fin dla conferënza stampa.

Definí sperses por le frabiché alisiré

"Tan plü important él da se anuzé te na manira mirada di stromënc dan man, por cherié y garantí por n tëmp plü lunch lercs abitatives che an é bogn da paié, por ti pité ala popolaziun locala prospetives te sües valades", á sotlinié l'assessuria provinziala responsabla por les abitaziuns Ulli Mair. Tl ciamp dles proprietés fossel da pité por chësc dantadöt che al gniss scrit fora sperses por l'abité alisiré chël ó dí "n abité cun n lian sön le prisc", che vëiga dant n lian, che podess ti sotrá le terac ales dinamiches de marcé normales. "Insciö pón garantí che le raiun abitatif cherié danü vais te na manira mirada a bëgn dla popolaziun locala. Le lian por la jënt dl post (aladô dl articul 39 dla lege provinziala Sperses y contrada) é n stromënt n pü' plü debl, ciodiche la pratica á desmostré che i apartamënc vëgn cumprá sciöche abitaziuns por le personal dles strotöres turistiches. Paralelamënter ai lec mëssel ince gní cherié raiuns abitatifs, insciö l'assessuria provinziala tratan la sentada.

Se anuzé dles poscibilités de abitaziuns da afité d'interes publich

Mo ince tl ciamp dl afit deura la reforma dles abitaziuns poscibilités nöies, á recordé l'assessuria provinziala. "Cun les abitaziuns da afité de interes publich él gnü cherié n stromënt cun chël che al podess gní a se le dé apartamënc afitá a n prisc che an pó se pormëte. Propi tles valades ladines vëgnel insciö recuperé y anuzé cubatura bele dan man". Potenzial él por ejëmpl tles frabiches de proprieté dles cöres y dles organisaziuns eclesiastiches. Le Comun de Mareo é bele tl laur da arjigné ca n proiet, an se dejidrass ince d'atri proiec de chësta sort por podëi ti pité ala jënt jona apartamënc che ai é bogn da se paié.