Le teater sciöche na ocajiun pedagogica por promöie le plurilinguism

La rapresentaziun te dui lingac "La sorücia Frederick y la forza dla fantasia" tles scolines ladines – Na iniziativa dla Intendënza y Cultura ladina

BALSAN (USP). Na esperiënza teatrala che tol ite i lingac, les emoziuns y la fantasia. Ai mituns y ales mitans dles scolines ladines ti él gnü pité la poscibilité da tó pert ala rapresentaziun te dui lingac "La sorücia Frederick y la forza dla fantasia". Les prömes rapresentaziuns ê gnüdes a s’al dé de dezëmber, cun n valgönes lapró ala fin d’aurí, y ares á descedé n gran entusiasm y na partezipaziun ativa.

La rapresentaziun metüda a jí da Markus Westphal y portada en scena da Julia Augscheller y da Paolo Tosin á afasciné le publich di mituns y dles mitans dales prömes scenes inant y á trasformé le teater te na lerch por descurides y interaziuns. Adöm cun i joblers é le publich di mituns y dles mitans instës sté protagonist, cun la partezipaziun a dialogs, cianties y jüc deboriada por todësch y por talian.

Tl zënter dla rapresentaziun él sté la sorücia Frederick, che tratan che i atri abina adöm da mangé por l’invern, s’un stá a somié cun i edli daverc. Pordërt laora ince Frederick. Al cöi adöm i rais dl sorëdl, i corusc y les parores. Avisa chis „tesurs nia da odëi“ ti porta a döta la comunité cialt, consolaziun y ligrëza ti momënc plü ris. 

"Chësta rapresentaziun teatrala á pité na ocajiun de valüta por renforzé le plurilinguism te nostes scores y por le porté ite te n contest che n’é nia ma chël scolastich" á sotrissé le Diretur de Departimënt dla Intendënza y Cultura Ladina André Comploi.

"L‘esperiënza é stada na ocajiun pedagogica importanta por promöie le plurilinguism, por stimolé la fantasia y por descedé la ligrëza pro i mituns y pro les mitans da tó pert ala rapresentaziun y da descurí", spliga la Ispeturia dles scolines Genny Ploner.

Le Diretur dla Direziun dles scolines Ladinia René Pescoll á sotrissé che al é sté na gran ligrëza che dötes les scolines á albü la poscibilité da tó pert ales rapresentaziuns y che "Al é important, dantadöt tl’eté dla scolina, da pité de te esperiënzes".

Al é sté na iniziativa che á desmostré sciöche le teater pó deventé n stromënt de valüta por crësce deboriada, por imparé y dantadöt por somié. An dess ciaré da pité inant ince tl dagní de te esperiënzes, che tol ite l’imparé, les emoziuns y la partezipaziun ativa di mituns y dles mitans. L‘Intendënza y Cultura ladina á podü ti pité chëstes rapresentaziuns al publich di mituns y dles mitans dles scolines dilan al sostëgn da pert dla Fondaziun Cassa de Sparagn.