Per renfurzé la rujeneda y cultura ladina

La Jonta provinziela de Bulsan dà pro l program anuel y i nvestimënc dl Istitut Ladin Micurá de Rü – L assessëur provinziel Alfreider: "N cuntribut mpurtant per renfurzé la rujeneda y cultura ladina"

BULSAN (USP). Publicazions scientifiches coche la revista renumeda Ladinia, publicazions de libri de storia y cultura di ladins dla Dolomites – mé per dì la Storia dla Rai Ladina – coche nce diziuneres ladins, la banca dac cun tesć ladins y cun traduzions ladines, na app Ladin, na plataforma internet cun banches dac cunliedes una cun l’autra, na gramatica online y na banca dac di toponims di Chemuns dla Val Badia y de Gherdëina ie nce te chësc ann 2026 tl zënter dl’ativiteies dl Istitut Culturel Ladin Micurá de Rü. Leprò saràl nce mo n cunvëni n ucajion dla fundazion dl Istitut dan 50 ani, inant l cuncors de leteratura Scribo, l Di dla Cultura ladina, cursc de ladin, cursc per se njenië ca per i ejams de ladin per la nseniantes y i nsenianc, material didatich tla rujeneda ladina n con’ dla storia di ladins dla Dolomites, la cataloghisazion de libri nueves nsci coche pruiec y scumenciadives cun d’autra istituzions cultureles.

La Jonta provinziela à te si senteda di 13 de merz, sun pruposta dl assessëur provinziel Daniel Alfreider, dat pro l program anuel dl Istitut Culturel Ladin Micurá de Rü per i ani 2026, 2027 y 2028. Oradechël àla dat pro de dé n cuntribut de 571.000 euro per l’atività culturela y la agënda de furmazion permanënta te chësc ann 2026. Lum vërda nce per n cuntribut de 25.000 euro per nvestimënc te hardware per njins che va debujën per jì inant cun l’ativiteies cultureles.

"La publicazions scientifiches y i pruiec scientifics dl Istitut Culturel Ladin Micurá de Rü ie n cuntribut zentrel per la nfrusceda, tueda y nrescida y per la documentazion y l svilup dla rujeneda y cultura ladina", sotrissesa l assessëur provinziel Afreider: "Cun l’apruazion dl program dl’atività y dl finanziamënt aldò garantions che l sibe i presuposć acioche chësta atività mpurtanta ne vënie nia mé purteda inant, ma nce slargeda ora."

"L Istitut Ladin Micurá de Rü à coche zënter de cumpetënza per la rujeneda y cultura ladina na funzion de dé dant de ce viers jì, y chësc per la cuntreda culturela de duta la Ladinia", spiega l diretëur dl Ressort Furmazion y Cultura Ladina André Comploi: "Ti ani passei se àl Istitut do y do for svilupà, se nuzan sambën for di mesuns dla digitalisazion te na maniera mireda. De gra al finanziamënt da pert dla Provinzia de Bulsan iel garantì che chësc lëur vënie purtà inant y che l Istitut posse vester garant de cuntinuità, inuvazion y n renfurzamënt dl ladin che posse se mantenì tl tëmp."