Polizai de Chemun: se nuzé dla sinergies danter plu Chemuns

La Jonta provinziela ti raions ladins (2/5): i ambolc de Gherdëina y Badia fej referimënt a problems de personal

SAN MARTIN DE TOR (USP). Tl ciamp dla segurëza publica iel pra la senteda dla Jonta provinziela tla Val Badia ai 13 de utober unì rujenà dla situazion dla polizai de Chemun. Seguré che l personal dla Uniteies sibe assé de cumpëida; chësc ie stat n cruzi particuler che i ambolc di Chemuns dla Val Badia y de Gherdëina à auzà ora. L’assessëura per la Segurëza provinziela Ulli Mair à n chësc cont fat referimënt ala lege nueva di polizaies de Chemun y ala tratatives bele nviedes via per l renuvamënt dl cuntrat culetif di polizaies.

Pra l’ancunteda à i ambolc auzà ora che n servisc de polizai de Chemun che funziunea, che ie plu daujin ai zitadins y che ie struturà miec ie mpurtant per i Chemuns dla valedes ladines. La mancianza de personal vën mpo for plu y plu sentida tla Uniteies aministratives, perchël iel na gran ndesfideda chëla de vester boni de seguré personal assé.

L'assessëura Mair à metù a cuer de se mëter adum a livel sëuracumenel

L'assessëura Mair à n chësc cont auzà ora che i Chemuns dla valedes ladines à, pervia dl gran trafich y dl turism, bele da tradizion do la rata truep polizaies de Chemun. "Ma danz che te chësc mumënt ne se àn mo nia metù adum a livel sëuracumenel y l ne n'ie ënghenó preudù vel' da de tel. Uni Chemun se urganisea inant la polizai de Chemun mé te si sëides dl luech," da coche à dit Mair.

Chësc ie da muië, ajache sce n se metëssa adum danter plu Chemuns respetivamënter grupes pudëssun avëi vantajes urganisatifs, dantaldut l mesun de curì miec y te na maniera plu flescibla i servijes. "La lege provinziela nueva prevëija nce n sustëni finanziel, sce n se mët adum," à lecurdà Mair cun referimënt ala lege nueva di polizaies de Chemun che ie unida data pro de juni dal Cunsëi provinziel de Bulsan. Sce n se mët adum sàutel dantaldut per i mëndri Chemuns ora de pudëi pité n servisc de polizai plu efiziënt y prufesciunel.

De miëura cundizions de lëur tres l cuntrat culetif nuef

N cont de tò su personal, fej Mair inant referimënt ala proscima revijion di cuntrac culetifs per la polizai. "N chësc cont vëniel bele rujenà cun la Lia di Chemuns, ajache ulon purté pro a n miuramënt dla cundizions de cuntrat. N uel fé unì plu atratif l image prufesciunel di polizaies de Chemun, acioche l sibe nscila plu saurì a abiné personal assé, almanco te na previjion de n n tëmp plu lonch," à nunzià Mair.