Radio Rumantsch: cun i 14 de aurí vëgn les trasmisciuns dades sö

 Tl dagní sarál ma plü da ascuté le radio tres DAB+. La mudaziun porta pro a na miú cualité y na maiú efiziënzaz.

BALSAN (USP). Le Radio Rumantsch ne sará da en mertesc ai 14 d’aurí inant nia plü da aldí tres les ones ultracörtes (UKW). L’ënt radiofonich de Südtirol (RAS) destöda i ultims sis implanc de difujiun a ones ultracörtes. I programs romagn inant da aldí sura döta la provinzia tres le standard digital DAB+ (trasmisciun audio digitala).

Por les ascutadësses y i ascutadus ó chësc dí: chi che oress ciafé sö le Radio Rumantsch ince tl dagní, chi adora n radio DAB+ aladô. Tla maiú pert di posć de Südtirol é la rezeziun bele sëgn poscibla, zënza problems. Le 99 porcënt dla popolaziun pó ascuté programs DAB+.

Destodá vëgn i implanc che trasmët a ones ultracörtes tl Alt Venost, a Taufers tl Vinschgau, a St. Martin am Kofel, Col Alt, Mareo y Ciastel. Utimamënter curî chisc implanc ma plü incër le 16 porcënt dla popolaziun.

Ti agn passá á RAS amplié te na manira consistënta la rëi digitala DAB+, y Radio Rumantsch é oramai a desposiziun indlunch a livel provinzial tres la rëi digitala, ince te chi raiuns che ne ê denant nia arjunc dales ones ultracörtes. L’ativité paralela de ones ultracörtes y de rëi digitala comporta de gragn cosć y ara é tecnicamënter nia efiziënta. Le sistem digital é incër vint iadi plü efiziënt respet ales ones ultracörtes, y pormët da trasmëte cotan plü programs cun na miú cualité.

Destodé i implanc a ones smendrësc porchël le consum de forza eletrica y i cosć de manutenziun y de reparaziun y pormët da mëte les ressurses sön na tecnologia orientada al dagní. Te döta Europa él tres plü regiuns y staziuns radio che vá chësta strada y che tol demez les trasmisciuns analogiches.

La RAS (l’ënt radiofonich de Südtirol) aconsiëia a düc i anuzadus y les anuzadësses da se sintonisé adora assá sön DAB+. Tröc aparac radio moderns, ti auti o te ciasa, á bele chësc sistem sciöche standard. Canche an cumpra n aparat nü, desson mëte averda al logo DAB+.

Por la maiú pert di ascutadus y dles ascutadësses ne se lascia chësta mudaziun gnanca sintí, deache Radio Rumantsch vëgn trasmetüda bele da n pez incá, y cun suzes, tres DAB+.