Scioldi per assistënza pra dianiosa de demënza 

Chiche à na dianiosa de demënza giapa scioldi per assistënza zënza na categurisazion sëuraprò – Tl ann 2025 iel unì dat ora 314,2 milions de euro per scioldi de assistënza

BULSAN (USP). Chiche vën curà a cësa o te na cësa de paussa à la rejon de giapé scioldi per l’assistënza. Tl ann 2025 iel per chësc fin unì metù a despusizion de ndut 314,2 milions de euro, chisc ti ie jic a bën de ades 16.000 persones, ulache la gran pert de chisc ie unida cureda y à giapà assistënza diretamxnter a cësa. Per smendré mo deplù i tëmpes che n muessa aspité tla categurisazion dla sort de assistënza, iel unì laurà ora n pachetl de mesures aposta. N pont fundamentel ie tlo l mesun, per chiche à na dianiosa de demënza, de ti ruvé permez plu saurì al cuntibut finanziel de assistënza. Chësc toca uni ann ntëur a 1.200 nchin a 1.300 persones, pra chëles che l ie unì dianusticà demënza, aldò dla Azienda Sanitera dla Provinzia de Bulsan.

La deliberazion revardënta ie unida fata da pert dla Jonta provinziela de Bulsan ai 24 de auril, sun pruposta dl’assessëura provinziela per l soziel Rosmarie Pamer. "L ie tëmpes lonc da aspité, aldò dl raion danter 4 y 11 mënsc. L ie tlo bën da dì che smendré i tëmpes tan lonc ne n’ie nia zeche che n fej per udëi pona la cunseguënzes positives da ncuei nchin a duman. Da canche l pachetl dla mesures aposta ie unì elaurà iel bele suzedù mpo mpue’ de zeche, ma l resta mo n troi lonch y ntenscif, sun chël che jon inant te na maniera cunseguënta y cun lëur y mpëni ntenscif", da coche l’assessëura provinziela Pamer à auzà ora pra la prejentazion dla deliberazion. 

"Do che l ie bele unit a s’l dé na categurisazion a puntin dla situazion sanitera te una dla tliniches memory dla Provinzia de Bulsan, tómel pona demez la categurisazion da pert de nosc teams. Per fé dumanda per giapé i scioldi per l’assistënza tléchel damoinla avëi n atestat dla tlinica memory", spiega Pasquale Basile, diretëur dl Ufize provinziel per la Categurisazion de Assistënza y Cura. Chësta regulamentazion vel nce per dumandes che ie bele unides dates ite ma ulache l ne n’ie nia unì fat la categurisazion y pra chëles che la dianiosa de demënza ie unida atesteda do i 1. de utober dl 2025. Oradechël iesun tl lëur de se mpenië de mëter mpe teams de categurisazion sëuraprò y de pudëi fé la categurisazion per l’assistënza te locai aposta nzaul daujin da cësa. De chësc viers à l’assessëura provinziela Pamer ai 23 de auril de chëst ann vijità i locai nueves a Neumarkt, ulache l vën bele fat categurisazions de assistënza.