SS 244 dla Val Badia: ai 24 y 25 otober gnarál romené demez lëgns

La strada restará daldöt stlüta chisc dui dis por desgorje i lëgns infetá dal chefer. Le trafich lisier podará transié tres Rina.

MAREO (USP). En sabeda ai 24 y en domënia ai 25 d’otober gnará la strada statala SS 244 dla Val Badia stlüta daldöt al trafich, tl raiun dl Comun de Mareo, por n toch de 500 metri danter Longega y Picolin. La stlüta vá debojëgn por taié jö y desgorje i lëgns infetá dal chefer, cun le fin da garantí la segurëza sön strada, sciöche le presidënt dla Provinzia, y assessur ala Proteziun zivila, Arno Kompatscher sotrissëia: “I rengraziëii düc i interessá por so impëgn y i anuzadus dla strada por süa comprenjiun. Les limitaziuns temporanes é por la segurté de düc”.

Por le trafich lisier él preodü na deviaziun tres la strada provinziala por Rina. Le trafich pesoch mëss indere gní devié sön n tru plü lerch. Le trasport dl lat pó gní fat tres la strada provinziala da Rina. Por ci che reverda le trasport publich, vëgn la linia 460 partida sö te döes perts: üna jará ma da Bornech a Longega y l’atra da Picolin a Calfosch, deperpo che la linia N460 jará ma da Picolin a Calfosch. I orars de referimënt é desponibli sön la app südtirolmobil y sön la plata web de südtirolmobil.

L’assessur provinzial ales Infrastrotöres y Mobilité Daniel Alfreider spezifichëia: “Le tó demez le lignan impesté dal chefer é na mosöra fondamentala por che le trafich sön la strada dla Val Badia sides plü sigü. I lauranc dl Sorvisc dles strades y i stödafüch volontars conësc bun les situaziuns olache i lëgns toma jö sön chësta strada dër traficada y mët al prigo i anuzadus. I messun smendrí plan plan chësc problem”.

L’assessur provinzial ai Bosć Luis Walcher injunta: “Le pëis dla nëi, i lëgns sciurá jö da Vaia y la coia dal chefer nes mët dan da desfides particolares ince ti raiuns dla Val Badia, y propi chiló messunse alzé fora tan importanc che i bosć sagns é por la sconanza de nostes strades y de nostes contrades. I sun contënt che, dilan al impëgn de nosc Sorvisc forestal, bele da d’aisciöda éra jüda da desgorje incër 4.200 metri cubics de lignan y mëte en segurëza i raiuns plü prigorusc”, á injunté Walcher. “Ince por i laurs che gnará tosc metüs a jí, oressi sotrissé la buna colaboraziun danter le Sorvisc forestal, le Departimënt Infrastrotöres y Mobilité, i proprietars di bosć y les dites trates ite. I rengraziëii düc por so impëgn y i ti aodi che i laurs garetes en segurëza y zënza dificoltés” á stlüt jö l’assessur.

En particolar, sön la strada statala dla Val Badia, al’altëza de Longega, dales 8.00 di 24 d’otober cina les 18.00 di 25 d’otober él preodü da romené demez i lëgns infetá dal chefer, por garantí la segurté de chi co passa sön la strada y dles infrastrotöres. Ara se trata dles ultimes fases di laurs bele inviá ia da d’aisciöda/isté por smendrí le prigo dles tomades y mioré la segurëza sön strada. Tl toch en chestiun é la Repartiziun Infrastrotöres tl laur da mëte en segurëza la strada cuntra la tomada de peres, y ara podará insciö aprofité dla stlüta totala dla SS 244 por realisé dui canai de desgorta tl cheder dles atres mosöres de segurëza.

Aladô dl Departimënt Infrastrotöres y Mobilité se damana la difujiun dla coia dl chefer n intervënt de prescia, chël che é oramai en gran pert stlüt jö. I laurs en chestiun vëgn coordiná danter dötes les repartiziuns dl Departimënt Mobilité y Infrastrotöres y dl Departimënt Agricoltöra, Bosć y Turism, en colaboraziun cun i proprietars privac di bosć.