Ti dé pruspetives ai maestri de schi jëuni che vën do

La Lia dla Scoles de Schi de Südtirol se à ancuntà cun l presidënt dla Jonta provinziela Kompatscher y l assessëur Walcher

BULSAN (LPA). Co possa pa maestri y la maestres de schi da tlo avëi nce tl daunì de bona pruspetives prufesciuneles te Südtirol? Chësta dumanda ie ai 7 de utober stata tl zënter de na ancunteda danter l sëurastant provinziel Arno Kompatscher, l assessëur per l Turism Luis Walcher, Elisa Montali, diretëura dl Departimënt Funzions dl Turism, y l Cunsëi dl’Assoziazion dla Scoles de Schi de Südtirol. La Lia fova reprejenteda dal presidënt Flavio Prinoth, dal vizepresidënt Roland Antholzer y dai cumëmbri de Cunsëi Leo Zambon y Günther Mayr.

N ucajion dl'ancunteda iel nce unì tucà la cuestion dl svilup nce tl daunì dla cundizions cheder legheles, dl'idea dla Lia-Assoziazion, dl slargiamënt dl'atività dla Scoles de Schi y la cuestion dlicata dl acumpaniamënt de grupes de schi da d'autri Paejes d'Europa da pert de Tour Operators.

“Ulon che la maestres y i maestri de schi che à abù la furmazion te Südtirol ebe nce tlo de bona pusciblteies prufesciuneles. Tl medemo mumënt iel mpurtant a seguré la gran cualità y i miëur standards di maestri de schi de Südtirol,” coche à sotrissà l presidënt dla Jonta provinziela de Bulsan Arno Kompatscher. Ël à sotrissà de ulëi tenì ite la cundizions iuridich-legheles cheder che ie bele, che ti segureie de bona pruspetives prufesciuneles ala maestres y ai maestri de schi che à fat tres te Südtirol l iter furmatif.

Nce l presidënt dl’Assoziazion di Maestri y dla Maestres de Schi Flavio Prinoth à sotrissà la mpurtanza di jëuni y dla jëunes da tlo che vën do tl ciamp dl nseniamënt a jì cun i schi: “Nosta scoles de schi ti dà n cuntribut mpurtant ala cualità dl turism y furmea uni ann jëuni y jëunes coche maestres y maestri de schi cun na cualifica scialdi bona. A chisc jëuni y a chësta jëunes muessun nce ti pité na pruspetiva prufesciunela te Südtirol.”

L assessëur per l Turism Luis Walcher à garantì si cunlaurazion, ajache “nosta Scoles de Schi ie truep deplù che mé n uperadëur de nseniamënt de schi. Les ie n partner mpurtant dl'ecunomia dl turism y porta pro te na maniera essenziela che i ghesć vëije si sujurnanza te Südtirol coche na esperienza olistica, ntiera.”