Afitadus privac: Definí i criters por na cualificaziun profescionala

Le Govern provinzial fissëia i criters por na cualificaziun profescionala de afitadus privac de ciamenes y apartamënc aredá - Assessur provinzial Walcher: "Garantí la basa por na formaziun solida"

BALSAN (LPA) Al mëteman de jügn dl 2025 él gnü aprové la reforma abitativa cun le fin da cherié na lerch abitativa che la jënt residënta pó se pormëte. Chiló él gnü porté ite danü ince la premissa por na cualificaziun profescionala di afitadus privac de ciamenes y apartamënc aredá. Chësta dess garantí che i standard de netijia, manutenziun y assistënza di sciori vëgnes tignis ite y che al vëgnes impara ince aumenté la cualité y la coscienziosité dl afité.

Te süa sentada di 10 de aurí á le Govern provinzial fissé sön proposta dl assessur por le turism Luis Walcher i criters por la cualificaziun profescionala di afitadus privac de ciamenes y apartamënc aredá. "I afitaciamenes privac y tradizionai é na pert importanta de nosta oferta turistica. Nosta intenziun é chëra da garantí na formaziun solida dles porsones che laora tl turism te chësc ciamp" sotrissëia l'Assessur por le turism Walcher: "Le Südtirol ciara insciö da pité na formaziun dlungia la pratica y da avëi standards tlers por na maiú cualité tl turism."

Tl Südtirol él incër 4.200 afitadus privac. Por tó sö la ativité mëss les porsones che la pita avëi stlüt jö na formaziun revardënta o avëi fat n curs profescional tl ciamp dl turism y dla gastronomia, avëi la abilitaziun profescionala aladô dl ordinamënt dla hotelaria o mostré sö la partezipaziun positiva a n curs spezialistich. Le curs tol ite almanco 80 ores y cür argomënc zentrai sciöche saludé i sciori, economia aziendala, management de manifestaziuns, produc regionai, marketing, storia y digitalisaziun.

Al momënt vëgnel organisé n curs dala assoziaziun plü rapresentativa a livel provinzial, la assoziaziun di afitadus privac dl Südtirol VPS; al mët man ala fin de aurí y gnará pité por talian y por todësch.

La assoziaziun di afitadus privac dl Südtirol esist dal 1980 incá y cumpëda al momënt incër 1.000 mëmbri. "Les ghiranzes nöies porta por tröc afitadus privac imprömadedöt malsegurëza - tl medem tëmp êl gran ora che al gniss fat valch" sotrissëia le presidënt dla assoziaziun Hannes Gasser: "Tl Südtirol él n gran numer de afitadus privac che se á moiü cina ciamó te n raiun grisc - zënza standards tlers, zënza na cualificaziun unitara. Avisa chiló cheriëia le regolamënt nü ordin y impëgn. I un colaboré intensivamënter sciöche assoziaziun a chësc program. Al nes é extra important che les formaziuns bele esistëntes - sciöche por ejëmpl la academia di afitadus - vëgnes reconesciüda. Les gran plataformes se damanará tl dagní tres deplü cualificaziuns y formaziuns, por podëi mostré sö les aziëndes. Le Südtirol fej chësc vare cun cosciënza adora - y dá dant insciö n sëgn tler. Sciöche assoziaziun sunse le post de consultaziun por düc chi che adora sostëgn, orientamënt y aiüt concret. Nosc travert é chël da trasformé chësc svilup te na dërta sbürla de cualité por i ospitanc privac tla Provinzia."

Ince istituziuns de formaziun reconesciüdes pó tl dagní pité de te cursc te so program formatif.