Detlaraziuns de portignënza al grup linguistich dai 2 de novëmber

Le Presidënt dla Provinzia Kompatscher anulëia la sospenjiun – L'ofize competënt dl Tribunal de Balsan röia porintant tla Via Garibaldi 4 a Balsan

BALSAN (OSP). Dai 2 de novëmber inant pón indô jí a damané do la detlaraziun de portignënza o agregaziun al grup linguistich. Chësc é ci che le Presidënt dla Provinzia Arno Kompatscher á desponü cun la mosöra de prescia n. 11 di 22 de otober dl 2026. Cun chësta mosöra vëgnel anulé la sospenjiun, che ê gnüda comanada do che al ê tomé adöm na pert dl frabicat dl Tribunal de Balsan, cun la mosöra de prescia n. 5 di 17 de messé dl 2026.

Sënta nöia tla Via Garibaldi

Por podëi tó indô sö debota l'ativité dl ofize competënt á la Provinzia ejaminé sü imobii. Al é gnü chirí n post adaté olache la jënt sciafiass da rové pormez debota y saurí. Le miú post ê l'imobil provinzial tla Via Garibaldi 4 a Balsan. Sëgn vëgnel tut porintant sciöche sënta dl ofize dl Tribunal de Balsan competënt por les detlaraziuns de portignënza al grup linguistich.

La surandada al Comun de Balsan vëgn sburlada

Le dërt de adoranza dl imobil por 30 agn alalungia ti ê bele gnü conzedü ai 22 d'otober al Comun de Balsan. La surandada al Comun vëgn sëgn sburlada de trëi agn.