Cultura dl feedback coche strumënt per miuré l lëur da uni di

Di dl Departimënt dl’Intendënza y Cultura Ladina cun la Repartizion Aministrazion dla scola y cultura ladina y la Direzion provinziela dla Scolines y Scoles ladines

BULSAN (USP). Se giamië ora, pensé do y crëscer deberieda fova al zënter dl Di dl departimënt dl’Intendënza y Cultura Ladina cun la Repartizion Aministrazion dla scola y cultura ladina y la Direzion provinziela dla Scolines y Scoles ladines.

La tematica zentrela dl'ancunteda fova la cultura dl feedback coche strumënt per miuré l lëur da uni di, per renfurzé la cunlaurazion y per svilupé inant la cumpetënzes internes, se scutan su un cun l auter, se giamian ora te n barat costrutif y comunican te na maniera efizienta.

Te si ntervënt à l assessëur provinziel Daniel Alfreider auzà ora l valor strategich dl lëur dl departimënt: "L lëur dl’Intendënza y Cultura ladina ie de mpurtanza fundamentela, ajache l reverda truep ciamps dla realtà ladina. L ie mpurtant a pité ucajions de barat y de dialogh, acioche n posse pensé do di resultac arjonc, se giamië ora esperienzes y miuré mo deplù nosta maniera de cunlauré."

Ntan l di iel unì dat na udleda de reviers al ann passà y ai resultac plu mpurtanc dla sezions defrëntes dl departimënt. Tl ciamp dl'educazion iel danter l auter da auzé ora la ntroduzion de n'ëura de sport sëuraprò, l’elaburazion de na realisazion pratica dl profil dl‘Intendënza ladina, pruzedures nueves per ti jì permez a situazions de crisa y scumenciadives defrëntes de furmazion per l personal nseniant. Tl ciamp dla cultura à, dlongia l sustëni de lies, artisć y scritëures, dantaldut l proiet Di dla cultura ladina abù n gran suzes, purtan pro a sinergies de valor danter istituzions y lies. Mpurtantes fova nce la scumenciadives per la prumozion dla rujeneda ladina, per ejëmpl la Parola ladina dl'edema. Paralelamënter iel unì metù a jì de plu proiec Erasmus y Interreg, nce n cunlaurazion cun d'autra mendranzes, y nce na revijion dla cumpetënzes y dla pruzedures internes.

L diretëur per la furmazion y cultura ladina André Comploi à sotrissà l senificat plu sot dl lëur dl departimënt: "Nosc lëur tol ite truep ciamps y truepa jënt tl mond dla furmazion y cultura ladina: mutans y mutons, sculées y sculeies, nseniantes y nsenianc y cunlauradëures dl'aministrazion y dla lies cultureles, ulenteres y artistes y artisć de nosta cumenanza ladina. Nosc mpëni ie chël de ti sté daujin di per di y de se dediché al svilup dla furmazion y cultura ladina te si formes defrëntes. Datrai vala de se tò dl'aurela per pensé do deberieda a cie che ie garatà, de valorisé i resultac arjonc y de udëi pusciblteies nueves per crëscer y se miuré."