Cursc de furmazion per la ntlujion tl livel de scola secundera

Jonta provinziela de Bulsan dà pro la fundamënta iuridica per nvië via i cursc de spezialisazion per la furmazion tla ntlujion y per la furmazion primera per nsenianc dla scola mesana y dla scola auta

BULSAN (USP). Acioche la scola posse garaté vàl debujën de personal assé y sambën nce de personal da na bona furmazion. Per ti vester al problem dla mancianza de nseniantes y nsenianc de ntlujion coche nce de nseniantes y nsenianc per la scola mesana y auta y per vester boni de ti jì permez ativamënter ala cuestion dëssel tla Facultà de Scienzes de Pedagogia y Furmazion dla Università Liedia de Bulsan unì a s’l dé cursc sëuraprò per chisc doi ciamps. La deliberazions revardëntes ie unides dates pro ai 8 de mei dala Jonta provinziela de Bulsan

"Na furmazoin bën penseda y urganiseda, che sibe daujin ala realtà dl nseniamënt, ie na bona fundamënta per urganisé y manejé l miec che la va l nseniamënt da uni di te scola y te scolina. Ajache nëus on debujën de maestres y maestri de scolina che lëura cun mpëni y engagement, de nseniantes y nsenianc che acumpanieia nosta mutans y nosc mutons, nosc jëuni y nosta jëunes te si devenì de crëscer y de mparé", da coche à sotrissà cun forza l assessëur provinziel revardënt Philipp Achammer, che ova dat ite te Jonta la pruposta de deliberazion.

Per pudëi seguré n sistem de furmazion ntlujif muessa la scolines y la scoles tla provinzia de Bulsan vester bones de avëi for assé personal a despusizion. Per ti vester ala mancianza de nsenianc, coche la ie al mumënt, dëssun mëter a jì cursc de furmazion y de spezialisazion. I cursc de furmazion per la ntlujion vën metui a jì per duta trëi la grupes de rujeneda, paralelamënter al lëur te scola. De ndut vëniel dat ora 60 ponc de credit, partii su sun doi ani academics. De ndut iel a despusizion 133 lueges de stude.

La Direzion de Furmazion Tudëscia, la Direzion de Furmazion y dla Cultura Ladina y la Facultà de Furmazion dl’Università Liedia de Bulsan à laurà ora cursc de furmazion universiteres per la furmazion basilera dla nseniantes y di nsenianc per la scoles mesanes y autes de rujeneda ladina y tudëscia, che tën cont di bujëns particuleres dla scola te Südtirol y nce dla diretives de curnisc dla Provinzia Autonóma de Bulsan.

Chisc cursc de furmazion tol ite lezions tla Facultà de Scienzes de Furmazion y practica che vën cumpaniei da cuordinadëures de practicum y da tutores de practicum, sibe ëiles che ëi. De ndut iel preudù 83 lueges de stude. I presuposć avisa che va debujën per tramedoi i cursc de furmazion sarà da udëi tosc sun la plates internet dla Facultà de Scienzes de Furmazion.