Dat ora i pesć "Prestazions d’ezelënza 2026"

L vën unerà l mpëni ezeziunel tl ulentariat per la y tla junanza tla provinzia de Bulsan, tl Trentin y tl Tirol: l ie unì premià cin’ persones singules y trëi assoziazions dla provinzia de Bulsan

BULSAN (USP). Cun l pest "Prestazions d’ezelënza 2026 - ulentariat dla junanza" unerea l Tirol, Südtirol y l Trentin l mpëni de ulentariat ezeziunel tl lëur extrascolastich cun mutons y mutans y jëunes y jëuni. La zerimonia de premiazion de chëst ann ie stata tl NOI Techpark de Bulsan. De ndut iel unì premià 21 persones singules, ot pruiec dl’Euregio Tirol-Südtirol-Trentin y un n pruiet sëura la sëides di raions singuli ora.

"L ulentariat viv de gra ala persones che se tol su respunsabltà y se mpënia per i autri, dajan ca per ëi si tëmp, si ideies y si energies. Dantaldut l mpëni dla jëunes y di jëuni desmostra tan granda che ie la respunsabltà, la cuejon y l urientamënt de viers dl daunì da pert dla proscima generazion," à sotrissà la vizepresidënta dla Provinzia Autonóma de Bulsan Rosmarie Pamer.

L presidënt dl’Euregio y cumandant dl Tirol Anton Mattle à sotrissà che "l ulentariat ie na seva da ne pudëi nia se mpensé demez per nosta cumenanza – tl Tirol coche nce te Südtirol y tl Trentin. I jëuni y la jëunes che se dà ca cun mpëni tl ulentariat se sëurantol respunsabltà, fej unì su cumenanza y porta pro ativamënter a plasmé nosc daunì. Cun l pest ‘Prestazions d’ezelënza 2026 - ulentariat dla junanza’ purtons adum chësc mpëni, l metan a lum tl cuntest dl’Euregio."

L vizepresidënt dla Provinzia Autonóma de Trënt Achille Spinelli à da si pert auzà ora la mpurtanza dl mpëni ulenter dla jëunes y di jëuni sëura la sëides de rujeneda y de raion ora: "Ncuei zelebrons l cuer che bat de nosc raions: i jëuni y la jëunes che tol la dezijion de ti scinché si tëmp ai autri. A udëi mutans y mutons jëuni y assoziazions dl Trentin, de Südtirol y dl Tirol che cunlëura sëura i cunfins ora nes fej unì capazi y stolc: chësc desmostra che l’Euregio ie na realtà viva, fata de solidarietà y respunsabltà."

Cin’ jëunes y jëuni ulenteres de Südtirol ie unii premiei per si mpëni speziel. Si meric vën ora da si lëur cun i jëuni y cun la lies dal sport, dal lëur pra scumenciadives sozieles y de dlieja. Oradechël iel unì premià trëi pruiec che desmostra te na maniera ejemplera tan d’uni sort y inuvatif che l ulentariat di y cun i jëuni te Südtirol ie. 

L Cor di Jëuni Kyrios de Badia mët adum da passa 50 ani incà cualità de mujiga y atività junila plëina de vivanda, fajan nscila unì su na lerch intergeneraziunela de cumenanza, criatività y scumenciadiva persunela.

DUNG VFG de Bulsan se mpënia a fé unì vijibl l gaming coche forma cuntempuranea de cultura y furmazion y a sensiblisé la jëunes y i jëuni de viers de na maniera cunsavëivla y cumunitera de ti jì permez ai media digitei.

L pruiet "8–13 – PEACE & CRI" dl Cumitat provinziel de Südtirol dla Crëusc Cuecena Taliana ti dà inant a mutons y jëuni valores coche la solidarietà, la respunsabltà soziela y la zitadinanza ativa.

Coche pruiet sëura la sëides di raions singuli ora iel unì premià l’EuregioYoungJury dl Filmclub Bulsan. L pruiet tol ite jëunes y jëuni dl Tirol, de Südtirol y dl Trentin tl cuntest dl Bulsan Film Festival per ti cialé ai films, rujené te descuscions deberieda y sëurandé pona n pest.