De ndut 86 sculeies y sculées fej la matura te scoles ladines

L ejam de maduranza tla scoles autes dla valedes ladines scumëncia n juebia ai 18 de juni - Ejam de maduranza cun nuviteies

Bulsan (USP). Te puec dis scumëncia te duta la provinzia de Bulsan i ejams de maduranza. De ndut fej 4241 sculeies y sculées la matura. De chisc iel 86 sculeies y sculées che fej l ejam de maduranza te na scola ladina: 33 tl ITE Raetia a Urtijëi, 28 tl Lizeum d'Ert Cademia a Urtijëi, 18 tl ITE a La Ila, 6 tl Lizeum Soziel y Linguistich a La Ila y 1 tla Scola Profesciunela Provinziela per l Artejanat Artistich, "La Prufesciunela", a Urtijëi.

Tla scoles de rujeneda tudëscia iel chëst ann 2728 candidates y candidac per la matura che fej l ejam de maduranza. De chëstes y de chisc va 369 candidates y candidac te na scola prufesciunela de rujeneda tudëscia. De ndut 1427 maduranc y madurantes fajerà l ejam de maduranza te na scola de rujeneda taliana te Südtirol.