![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Di dla cultura ladina: N sada ai 19 de setëmber 2026 a Urtijëi
Do l suzes dl ann passà mët la Direzion Istruzion, Furmazion y Cultura Ladina dla Provinzia autonoma de Bulsan inò a jì l Di dla cultura ladina, n sada ai 19 de setëmber
BULSAN (USP). L Di dla cultura ladina ie na festa dedicheda ala jënt ladina, davierta nce a duta chëles y duc chëi che uel ti jì permez ala rujeneda y cultura ladina y nriescer si richëza.
L argumënt dl’edizion 2026 ie "Da na generazion a l'autra", n nvit a pensé do n con' dla mpurtanza de ti dé inant ala generazions che vën la rujeneda, l'arpejon culturela y la tradizions ladines, renfurzan nsci l'identità y fajan n puent danter la generazions.
L assessëur provinziel per la cultura ladina Daniel Alfreider sotrissea: "La cultura ladina ie na pert fundamentela dl'arpejon de nosc raion y merita de unì vivuda y valoriseda te na maniera for plu y plu cuscienta. Cun chësc di ulons crië na lerch ulache la cumenanza ladina possa se ancunté, se recunëscer te si cultura y tl medemo mumënt se giaurì a chi che uel la cunëscer. L suzes dla prima edizion nes à cunfermà la mpurtanza de jì inant sun chësta streda y de la mëter a jì damoinla uni ann."
L diretëur per la Istruzion, Furmazion y Cultura Ladina André Comploi jonta leprò: "L argumënt de chëst ann, “Da na generazion a l'autra”, nes mëina al cuer de na cuestion fundamentela: na rujeneda y na cultura resta n vita sce n les dà inant da na generazion al'autra. Garantì chësc passaje uel nce dì pité la cundizions acioche la rujeneda y la cultura ladina posse avëi n daunì, unian vivudes, cumpartides y valorisedes dala generazions che vën docà. Perchël ons metù su n program nia mé per cunté la cultura ladina, ma per la sentì diretamënter, tres l cunfront, i lauratueresc, la mujiga, l'ert y l'ativiteies defrëntes che vën pitedes ntan l di."
La manifestazion vën metuda a jì dala Direzion Istruzion, Furmazion y Cultura Ladina n cunlaurazion cun de plu istituzions y lies cultureles ladines: l Istitut Ladin Micurá de Rü, l Museum Ladin Ciastel de Tor, la Union Generela di Ladins dla Dolomites, l Circolo - Lia Mostra d'Ert, l'Uniun Adüm, l Istitut Cultural Ladin Majon di Fascegn y l Istitut Cultural Ladin Cesa de Jan, la Università Liedia de Bulsan y truepa d'autra istituzions y lies cultureles dla Ladinia.
Deplù n con’ dl Di dla cultura ladina uniral partì ntan na cunferënza stampa ai 9 de setëmber.
Deplü informaziuns
Di dla cultura ladina: l program
L di scumencerà dala 9.00 tla Cësa de Cultura, cun na lingia de referac dedichei al argumënt "La rujeneda ladina ncuei y duman". L ie udù dant ntervënc y reflescions de persones che reprejënta la istituzions ladines, ma nce mumënc de cunfront y nterazion cun l publich.
Dala doi inant saral tla Cësa de Cultura n domesdì criatif per pitli y granc, cun lauratueresc de teater, mujiga y cianté, scrì y d'autra ativiteies artistiches, daujin a mostres y vijites menedes.
Da mesa la 6 uniral nunzià l'opra d'ert che à venciù l pest Ert X Merit Ladin y l unirà premià l'artista che l'à fata. Te chësta ucajion uniral unerà l lecort de Franz Vittur, destinadëur dl Pest Merit Ladin 2026. Da dedò uniral nunzià chi che à venciù i cuncorsc letereres Scribo e Scribo Junior.
Dala 8 da sëira saral tla sënta dl Circolo - Lia Mostra d'Ert n salon culturel cun performance mujighela, leterera, de bal y pitura dal vif.
La sëira jirà inant dala 21.15 cun n cunzert metù a jì da na grupa de jëuni.
L Di dla cultura ladina 2026 ne sarà donca nia mé n mumënt de festa, ma nce na ucajion de cunfront y de partezipazion, tl sëni de na cultura viva, bona de se renuvé y de unì data inant ala generazions che vën do.
red
