"Di dla Scola Ladina 2026": udëi, acumpanië y valorisé

URTIJEI (USP). Coche bele da tradizion iel nce chëst ann unì a s’l dé l "Di dla Scola Ladina", chëst iede a Urtijëi ai 31 de agost. Chësta manifestazion à purtà adum l personal nseniant y pedagogich de duta la scoles y scolines ladines dan l scumenciamënt dl ann de scola. Pra l’ancunteda al fat pea zirca 300 persones, danter chisc fova l’autoriteies prejëntes: l Assessëur Provinziel per l’Istruzion y la Cultura ladina Daniel Alfreider, l diretëur dl’Intendënza y Cultura ladina André Comploi, l Intendënt Heinrich Videsott y truep dirighënc dla Direzion Istruzion, Furmazion y Cultura ladina y reprejentanc dla Direzions Istruzion y Furmazion tudëscia y taliana.

La edizion de chëst ann, dal titul Udëi, acumpanië y valorisé, à metù tl zënter dla reflescion la postura educativa, chël uel dì la maniera de ti jì permez ala sculées y ai sculeies per ti judé te si svilup. N à tematisà la mpurtanza de ti cialé ala persona cun cuscienza y respet, de ulëi scuté su y acumpanië la mutans y i mutons, la jëunes y i jëuni te si svilup y sun si troi de furmazion y de valorisé si putenziei ndividuei. L program à analisà la tematica dl di da pruspetives defrëntes y cumplementeres. Christoph J. Amor, dla Facultà de Filosofia y Teologia de Persenon, à mustrà coche la cunzezions defrëntes dla persona possa nfluenzé la pratica didatica. La scritëura y diretëura de scola Mariapia Veladiano se à dat ju cun la ndesfidedes che caraterisea la vita da uni di te scola. Agnes Irsara, ispetëura per l nseniamënt dla religion, à prejentà la scumenciadiva “Tö nes stas a cör” y Daniela Höller, garanta per la nfanzia y la junëza, à pità n cheder dla ncëries y di ciamps de atività dl Ufize dla Garanta. L di, muderà da Monica Moroder, ie finà via cun n mumënt de cunfront y cun na udleda ala pruspetives dl daunì.

"L Di dla Scola Ladina ie na ucajion de gran valor per se ancunté coche cumenanza educativa. La edizion de chëst ann nes nvieia a pensé do n con' dla maniera de ti jì permez ala persones, de les acumpanië y de udëi ite si putenziei. A chësta maniera judons pea a renfurzé na scola che scota su, che ie inclujiva y orienteda al daunì", à sotrissà l Ntendënt Heinrich Videsott.

Nce l Assessëur Provinziel Daniel Alfreider à auzà ora la mpurtanza fundamentela de na scola ladina sterscia per garantì l mantenimënt dl'identità linguistica y culturela: "L Di dla Scola Ladina lascia udëi tan dinamich y orientà al daunì che ie nosc sistem educatif. Na scola sterscia renforza nosta cumenanza ladina y gëura pruspetives nueves per l daunì de nosta valedes."