DIGI-RLF: Trëi rujenedes, un n daunì digitel
Cunliamënt tla rë per ladin, rumanc y furlan pra la Südtirol Free Software Conference SFSCON a Bulsan - Mesuns digitei nueves y nvit a lauré pea pra l pruiet Interreg DIGI-RLF
BULSAN (USP). L ladin dëssa sambën nce vester da pudëi unì manejà sun smartphone y computer. Ma per chësc màncel suvënz mo dac de rujeneda y mesuns digitei. Chësta locia dëssa l pruiet sëura i cunfins ora DIGI-RLF curì (USP à repurtà). La Repartizion Educazion y Cultura Ladina à rujenà pra la South Tyrol Free Software Conference SFSCON ai 13 y 14 de nuvëmber tl NOI Techpark a Bulsan cun esperc de nfurmatica dl daunì digitel dl ladin dolomitich, dl rumanc ti Grijons y dl furlan.
"Acioche l ladin reste vif y atratif, muessel vester da pudëi unì tëut ca deplën tla vita digitela da uni di dla jëunes y di jëuni, dal smartphone nchin ala aplicazions de chëles che n se noza l plu suvënz," sotrissea l assessëur Daniel Alfreider: "La cunlaurazion cun l'autra rujenedes retoromaniches nes lascia pro de mëter adum forzes y ressurses a puntin y de ti seguré a nosta rujeneda dl'oma n daunì digitel ndependënt."
L pruiet vën cofinanzià dala Union Europeica tres l prugram Interreg Talia-Svizra. Chësc prugram à danter l auter l fin de renfurzé y slargë ora i liams y i raporc che ie bele danter i raions de cunfin talian-svizri, caraterisei da na storia y cultura deberieda. L pruiet ie stat tl zënter de doi manifestazions.
Pra l barat daviert "Mind the language gap!" ai 13 de nuvëmber à reprejentanc dl'aministrazion rujenà cun svilupadëures de software, esperc de nfurmatica y nteressei. La finamira fova chëla de mëter su cuntac nueves y purté inant deberieda soluzions digiteles per la rujenedes de mendranza.
Ai 14 de nuvëmber à l diretëur de repartizion Mathias Stuflesser y l cunlauradëur de pruiet Robert Sama prejentà la strategia digitela deberieda, i vares inant fac nchin śën y i proscimi vares da fé. N azënt ie chël dl svilup de mudiei de recunescimënt linguistich cun l partner de pruiet Eurac Research: i dëssa trasfurmé automaticamënter l ladin rujenà te n test scrit.
"Na rujeneda ie suverena a livel digitel sce si cumenanza linguistica à i dac y i mesuns tecnics che va debujën per se nuzé te na maniera autodetermineda tl ciamp digitel," sotrissea l diretëur de Repartizion Stuflesser. Per fé chësc vàl debujën de n sustëni lerch: svilupadëures pudëssa tò ite l ladin ti programs che ie bele, nrescidëures pudëssa lauré pea pra pruiec che ie bele n droa. Nce zitadines y zitadins ie nviei a tò su registrazions o tesć a usc acioche l posse nscila unì slargià ora la culezions digiteles de rujenedes.
DIGI-RLF cunlieia i trëi raions linguistics y mët adum dac linguistics, standards tecnics y mesuns digitei. Nsci dëssa nce la rujenedes cun ressurses limitedes seguré si lerch tl mond digitel.
red/mac/dl
Bildergalerie
Documënc da desćiarié
- DIGI-RLF cunlieia i trëi raions linguistics y mët adum dac linguistics, standards tecnics y mesuns digitei. Nsci dëssa nce la rujenedes cun ressurses limitedes seguré si lerch tl mond digitel. (Foto: USP/Repartizion Educazion y Cultura Ladina) » [IMG 1 MB]
- (da man ciampa) Karin Comploj, Istitut Ladin Micurá de Rü, l diretëur de repartizion Mathias Stuflesser y l cunlauradëur de pruiet Robert Sama pra la Südtirol Free Software Conference SFSCON a Bulsan (Foto: USP/Repartizion Educazion y Cultura Ladina) » [IMG 543 kB]
- L diretëur de repartizion Mathias Stuflesser y l cunlauradëur de pruiet Robert Sama prejentà la strategia digitela deberieda (Foto: USP/Repartizion Educazion y Cultura Ladina) » [IMG 401 kB]

