Mparé ladin: didatica da dalonc nueva per sculeies dla scoles autes
La Jonta provinziela de Bulsan dà pro na cunvenzion de lëur cun l'Euregio Tirol-Südtirol-Trentin – Lezions online y ena n prejënza - Cuoperazion de duta la valedes ladines
BULSAN (USP). Chiche va do la scola mesana te na scola auta dedora dla valedes ladines ne possa iló de regula nia plu mparé inant ladin. Na pruposta nueva dëssa stlù ju chësta locia: la Jonta provinziela de Bulsan à te si senteda di 13 de nuvëmber dat pro la cunvenzion de lëur cun l'Euregio Tirol-Südtirol-Trentin, cun chëla che la Provinzia de Bulsan mët a jì l pachetl de lëur "Ladin tl tele-nseniamënt". L fej pert dl pruiet Interreg "Euregio goes School – EUREDU".
"La rujeneda ladina ie na pert essenziela de nosta identità. Cun chësc pruiet se nuzons di mesuns dla digitalisazion, acioche i jëuni y la jëunes posse mparé inant ladin nce canche i va a scola dedora dala valedes ladines," sotrissea l assessëur provinziel y vizepresidënt dla Jonta provinziela de Bulsan Daniel Alfreider, che ie unì autorisà dala Jonta provinziela a sotscrì l'Acurdanza: "Scialdi mpurtant ie dantaldut che te chësta scumenciadiva lëurel per l prim iede adum istituzions de duta la valedes ladines - dla Val Badia, de Gherdëina, de Fascia, de Fedom y de Cortina d'Ampëz - te n pruiet deberieda dl'Euregio. Chësc renfurzea la cuejion dla cumenanza ladina y mostra su coche l'Euregio piete ufiertes cuncretes cun plusvalor per la jënt."
L'ufierta mët adum l nseniamënt online, uni ena te doi liviei de niveau y te doi idioms ladins, cun na prejënza, uni ann, de n’ena alalongia te n raion ladin. L mudel vën n iede metù a jì te Südtirol. Ma pona iel nce per la sculées y i sculeies dla scoles autes tl Trentin preudù na tel ufierta, che se lascia paredlé a chëla de Südtirol.
Via n Sëuramont, cun Cortina d'Ampëz, Fedom y Col de Santa Lizia, svilupea l Istitut Culturel Ladin Cesa de Jan si prupostes de mparé la rujenedes per pitli, jëuni y granc.
L'EUREDU vën metuda a jì dala Euregio Tirol-Südtirol-Trentin coche partner lead deberieda cun l'Università de Dispruch y l Istitut Culturel Ladin Cesa de Jan. La fundamënta ie na plataforma scolastica digitela deberieda che mët adum l'ufierta furmativa dl‘Euregio. Preudù iel dlongia l nseniamënt a destanza dl ladin nce cuncorsc de scola, furmazions per nsenianc y nce chertes geografiches y storiches y d'autri materiai didatics.
L pruiet dëssa mëter adum ressurses y esperienzes sëura la sëides aministratives y geografiches via y renfurzé la cunlaurazion tl ciamp dla furmazion. L vën cofinanzià dala Union Europea tres l program de cunlaurazion Interreg VI-A Talia-Austria.
red/mac/dl
Documënc da desćiarié
- La Jonta provinziela de Bulsan à te si senteda di 13 de nuvëmber dat pro la cunvenzion de lëur cun l'Euregio Tirol-Südtirol-Trentin, cun chëla che Südtirol mët a jì l pachetl de lëur "Euregio goes School – EUREDU". » [PDF 3 MB]
- La Jonta provinziela de Bulsan à te si senteda di 13 de nuvëmber dat pro la cunvenzion de lëur cun l'Euregio Tirol-Südtirol-Trentin, cun chëla che Südtirol mët a jì l pachetl de lëur "Euregio goes School – EUREDU". L fej pert dl pruiet Interreg "Ladin tl tele-nseniamënt". La foto ie unida fata ntan na ancunteda dla grupa de cuntrol a Dispruch de mei de chëst ann (foto: USP) » [IMG 2 MB]