Ejam de maturité 2023-24: Les materies dla secunda proa scrita

L’Intendënza scolastica ladina á publiché incö les materies che gnará tratades tla secunda proa scrita dl ejam de Stat 2023-24 tles scores altes ladines.

Le MIM (Minister dl’Istruziun y dl Mirit) á definí tl decret nr. 10 di 26.01.2024 les materies dla secunda proa scrita dl ejam de Stat 2023-24 y les materies che ti gnará assegnades ai comissars esterns dla comisciun. Do che les indicaziuns dl MIM é gnüdes adatades ala realté scolastica particolara te Südtirol á l’Intendënta Edith Ploner comuniché incö, ai 31 de jená 2024, les materies dla secunda proa scrita tles scores altes ladines por l’ann scolastich 2023-24.

Por les trëi direziuns de stüde tl Lizeum d’Ert “Cademia” él gnü chirí fora les materies “Scultöra” (seziun Ert figurativa), „Grafica“ (seziun Grafica) y „Design“ (seziun Design). Tl Lizeum linguistich gnarál ejaminé tla secunda proa scrita la materia “Franzesc” y tl Lizeum dles Sciënzes Umanes la materia „Sciënzes umanes“. Tl Istitut Tecnich Economich - Aministraziun, Finanza y Marketing (sides a La Ila co a Urtijëi) é „Economia aziendala“ odüda dant sciöche materia dla secunda proa scrita; les studëntes dla seziun “Turism” dl ITE da Urtijëi se dará indere jö cun „Materies turistiches y aziendales“.

Tla Scora profescionala por l’artejanat artistich da Urtijëi sarál en chësc ann na novité, deache l’ejam de maturité messará tigní cunt dla reforma nazionala dles scores profescionales. Al ne é porchël gnü comuniché degönes materies por la secunda proa scrita. Söla basa de indicaziuns spezifiches dl MIM arjignará ca la comisciun instëssa le test dla secunda proa; la proa se dará jö cun tematiches y competënzes che é gnüdes tratades y svilupades tratan le percurs scolastich dles studëntes y di studënc.

Sciöche bele ti ultims agn sará les comisciuns d’ejam metüdes adöm da na presidënta o n presidënt da defora, trëi mëmbri interns y trëi mëmbri esterns che gnará nominá dal’Intendënza.

I ejams de Stat dles scores altes metará man en mercui, ai 19 de jügn 2024 cun la pröma proa scrita.

A scomenciamënt dla pröma proa podará les candidates y i candidac dles scores ladines chirí fora individualmënter sce ares/ai ó scrí le tema por talian o por todësch. La secunda proa scrita reverdará indere na materia caraterisanta dla scora alta frecuentada y ará le fin da valuté les conescënzes y les competënzes spezifiches dl studënt y dla studënta a conclujiun dla scora alta. Tla terza proa scrita gnarál spo ejaminé les competënzes dles studëntes y di studënc tl lingaz de insegnamënt che ne é nia gnü adoré pro la pröma proa scrita. L’ejam de Stat se stlüjará jö cun la proa a usc che tolará ite deplü les materies dl cuinto ann de scora alta.

Indöt él scrit ite atualmënter 108 studënc y studëntes tles cuintes classes dles scores altes tles valades ladines, de chisc 28 tl Lizeum d’Ert, 1 tla Scora profescionala, 42 tl ITE da Urtijëi y 37 tles Scores altes da La Ila.