Ejams de bilinguism y de ladin: Poscibilités nöies

Ejams de bilinguism y de ladin: Poscibilités nöies por les studëntes y i studënc dles scores altes dles localités ladines

BULSAN (USP). L'Edema di ejams de bilinguism, metüda da jí dal Sorvisc Ejams de bi- y trilinguism en colaboraziun cun les trëi Intendënzes á confermé l'interes tres maiú dles scores altes por chëstes oportunités de formaziun tan importantes. Ince les scores altes dles localités ladines á tut pert ativamënter al'iniziativa y á arjunt resultac particolarmënter incorajënc. L'ejam de bilinguism che é gnü fat a Balsan á mostré sö dër n bun livel de preparaziun da pert dles studëntes y di studënc che á tut pert, conferman l'efiziënza dl percurs formatif che ai á fat tles scores de nosc raiun.

L'assessur provinzial Daniel Alfreider á sotrissé: "L'iniziativa confermëia le valur da ti pité ince ales studëntes y ai studënc dles localités ladines la poscibilité da fá i ejams de bilinguism y de ladin bele tratan so percurs scolastich, valorisan les competënzes plurilinguales y amplian les oportunités formatives. I speri ince che chësta poscibilité pois gní svilupada inant y tl dagní ince gní metüda a desposiziun tles sëntes plü dlungia o diretamënter tles valades ladines."

L'intendënt ladin Heinrich Videsott detlarëia le valur de chisc resultac: "Sciöche bele alzé fora tratan la conferënza stampa por la contlujiun dl ann de scora, se basëia le sistem paritetich ladin sön la valorisaziun valia de düc trëi i lingac dla provinzia tla vita de scora da vigni de. Chisc resultac desmostra che le model pedagogich apliché rapresentëia n sistem efiziënt."

Ince Claudia Rubatscher, ispeturia por le plurilinguism, á manifesté sodesfaziun por l'impëgn desmostré dai partezipanc: "Tratan les proes ái podü osservé cun tan de scerieté y conzentraziun che les studëntes y i studënc ti é jüs pormez al ejam. Ai á desmostré da odëi ite l'importanza de chësta poscibilité y á dé so miú, alzan fora maturité, responsabilité y na preparaziun sterscia."

L'esperiënza positiva fata chësc ann é n vare important inant tla promoziun dles competënzes linguistiches dles jones y di jogn che vá a scora tles localités ladines y desmostra le valur de n sistem scolastich che mët le plurilinguism al zënter de so proiet educatif.