Istruzion y Cultura ladina: cunfermedes la ncëries de direzion

Maria Kostner resta diretëura dl Ciamp Pedagogich, Alexander Piccolruaz diretëur dl Ufize per l'Aministrazion dla Scola y Furmazion, Jürgen Runggaldier per la Cultura Ladina y la Junanza Ladina

BULSAN (USP). L ie finà via la pruzedura per crì ora a chi ti sëurandé la ncëries de direzion de segondo livel, trëi de chëstes che à da n fé cun la Direzion Istruzion, Furmazion y Cultura Ladina.

La ncëries ie unides sëurandates tres cumpetënza dal diretëur per la Istruzion, Furmazion y Cultura ladina André Comploi. L resta i respunsabli da dant: Maria Kostner a cë dl Ciamp pedagogich, Alexander Piccolruaz per la direzion dl Ufize Aministrazion de Scola y Jürgen Runggaldier per la direzion dl Ufize Cultura Ladina y Jëuni Ladins.

"Rengrazie de cuer la diretëura Maria Kostner y i diretëures Alexander Piccolruaz y Jürgen Runggaldier per si mpëni ti ultimi ani y ti feje i cumplimënc per avëi mantenì si ncëries, ajache nscila vëniel garantì na cuntinuità al'azion aministrativa y de pruiet dl Departimënt. Ala diretëura y ai diretëures ti feji i miëur auguresc acioche i posse jì inant cun cumpetënza y dedizion cun l lëur fat nchinamò," dij l assessëur Daniel Alfreider.

"Ti ani de servisc coche diretëures de segondo livel à la diretëura Kostner y i diretëures Piccolruaz y Runggaldier desmustrà, tres si prufil prufesciunel y si percurs madurì, de vester defin adatei per si ncëries y de avëi n mpëni custant per l svilup dl sistem aministratif, educatif y culturel ladin," sotrissea l diretëur dl Departimënt Istruzion, Furmazion y Cultura ladina André Comploi.

L diretëur de repartizion Mathias Stuflesser y l ntendënt ladin Heinrich Videsott tol su cun plajëi la ncëria da nuef di trëi respunsabli, coche recunescimënt dla cumpetënzes, dl mpëni y di resultac arjonc ntan l mandat da dant.

N à nce cunfermà Katharina Moling coche diretëura dl Museum Ladin Ciastel de Tor. L assessëur Daniel Alfreider y l diretëur André Comploi ti fej i cumplimënc y ti fej i miëur auguresc acioche l'atività vede inant a bon fin, tl sëni dla valorisazion y dla prumuzion dla cultura y dl'identità ladina.