Karl Felix Wolff y la liënda de Re Laurin

En mercui ai 4 de merz él gnü tigní a Desproch n referat sön Karl Felix Wolff, dediché ala tradiziun narativa ladina, ala politica, ala leteratöra y al turism tles Dolomites.

INNSBRUCK (USP). Tratan l'evënt – organisé dal Literaturhaus am Inn adöm cun l’Archif dl Prener, en colauraziun cun l’Istitut Ladin Micurá de Rü y la Euregio Tirol -Südtirol -Trentino –  á la vizedireturia dl Istitut Brenner-Archiv Ursula A. Schneider baié cun l'esperta de Karl Felix Wolff, professuria emerita Prof. Ulrike Kindl (Université Ca'Foscari, Aunejia).

Karl Felix Wolff y süa arpejun leterara

Tres la publicaziun dl bestseller Dolomitensagen (1913) y chëra dla Monographie der Dolomitenstraße (1908), é Karl Felix Wolff sté bun da fá deventé la cuntia medievala de Re Laurin y la tradiziun ladina dl’inrosadöra n sëgn carateristich por le raiun dles Dolomites. Aldedaincö ne pënson gonot nia ai avenimënc storics y politics che á porté pro tratan le XX secul ala “invenziun dles Dolomites”. Karl Felix Wolff é sté te chësc contest na figöra d’importanza culturala por la Ladinia y por le Südtirol, mo ince por ci che reverda le scomenciamënt dl’epoca dl turism te chësta contrada.
La prof.ia Urlike Kindl á ince por so ultim liber, Kritische Lektüre der Dolomitensagen Bd. III: König Laurin und sein Rosengarten, San Martin de Tor: Istitut Ladin Micurá de Rü (2025), fat inrescides desvalies danter i documënc de Karl Felix Wolff conservá dal Archif dl Prener.

Archif dl Prener

L’Archif dl Prener é le zënter de documentaziun dl’Université de Desproch y l’istituziun che tëgn sö la maiú pert dl’arpejun leterara, culturala y storica dl Tirol todësch dai tëmps dla Pröma vera mondiala incá. Ince por i Ladins á chësc archif na valüta nia da püch, deache al é da ciafé de vigni sort de documënc che reverda la Ladinia y süa jënt.