Festival "Poesia alpina d’aldedaincö"

N proiet leterar danter les comunités linguistiches di Grijuns, dla Ladinia y dl Friul - Ai 08 y 09 de Ma 2026 a Porsenú

BULSAN/PORSENÙ (USP). Danter les comunités linguistiches di Grijuns, di ladins dles Dolomites y dl Friul él lians identitars y culturai strënc. Por renforzé chisc lians y por ti pormëte tl medemo tëmp a n publich n pü’ plü gran da conscidré la richëza leterara de chëstes comunités linguistiches, vëgnel metü da jí por le secundo iade, do la premiera garatada dl 2023, le Festival dla poesia alpina d’aldedaincö.

Ai 8 y ai 9 de ma 2026, tla biblioteca zivica da Porsenú, portará dant 15 poec y poetësses di trëi raiuns de mendranza sües poesies scrites aposta por l’ocajiun. La particolarité dl festival é che les poesies gnará presentades al publich nia ma tla verjiun originala, mo ince te süa traduziun todëscia o taliana; y la publicaziun che vëgn fora por l’ocajiun (Ediziuns Raetia) contëgn dötes les poesies tla verjiun originala mo ince tla traduziun taliana y todëscia. Presënc al festival sará ince i traduturs/traduturies: Walter Rosselli, Ruth Gantert, Ingrid Runggaldier y Michaela Heissenberger, chi che baiará dles desfidades de n te proiet de traduziun pro la mësa torona preodüda.

I responsabli dla cerna di auturs y dles auturies y dl ordinamënt leterar dles operes é i esperc de leteratöra Rico Valär (por i auturs di Grijuns), Roland Verra (por i auturs dla Ladinia) y Gabriele Zanello (por chi furlans). La moderaziun dla manifestaziun é tles mans de Mateo Taibon (RAI Ladinia). I grups musicai de Martina Linn (Grijuns), GOTA (Ladinia) y Nicole Coceancig (Friul) se fistidiará dla cornisc musicala dl festival, chël che gnará stlüt jö cun n conzert la sabeda sëra.

Dl’organisaziun dl Festival s’á cruzié la Lia Autores de Südtirol SAAV cun le sostëgn dl Zënter europeich de Leteratöra y Traduziun ZeLT. Le Festival vëgn sostigní dal Assessorat por la Formaziun y Cultura ladina dla Provinzia Autonoma de Balsan, dala Regiun Trentin-Südtirol, dal Ufize Promoziun dla cultura dl Ciantun di Grijuns y dala Fondaziun Svizera Pro Helvetia, y á le patrozine dl Consolat Svizer de Milan.

I auturs y auturies dla Ladinia: Rut Bernardi, Stefen Dell’Antonio, Marco Dibona, Silvia Liotto, Iaco Rigo;
l auturs y auturies dl Friul: Antonio Cosimo Di Biasio, Lucia Gazzino, Stefano Moratto, Silvio Ornella, Giacomo Vit; l auturs y auturies di Grijun: Nina Dazzi, Romana Ganzoni, Leo Tuor, Benedetto Vigne, Jessica Zuan.

L’entrada é debann y ara ne vá nia debojëgn de na iscriziun. Le Festival pó ince gní odü tres Livestream: microfilmdigital.it/live