La Jonta provinziela dà pro criteres per la Matura

I mudamënc à danter l auter da n fé cun l ejam a usc y la cumpusizion dla iuria de ejam.

BULSAN (USP). Sun pruposta di assessëures provinziei Philipp Achammer, Marco Galateo y Daniel Alfreider à la Jonta provinziela de Bulsan dat pro la regulamentazion n con’ dl ejam de Stat dl livel sotmesan y dl ejam de maduranza. Cun chësta vën despusizions stateles valivedes ora y metudes n droa per la realtà dla provinzia de Bulsan

Pra la nuviteies de majera mpurtanza iel la denuminazion, ajache l ejam à inò inuem "Ejam de maduranza – Matura", pona iel de nuef la cumpusizion dla cumiscions de ejam, i mudamënc de viers dl ejam a usc y nce de viers dl manejamënt di ponc de bonus. "Per la scola dla valedes ladines renfurzea y cunfermea chësta regulamentazion l prinzip dl nseniamënt paritetich: ladin, tudësch y talian ie cumpunëntes che fej pert dl medemo troi furmatif y unirà nce tëuc n cunscidrazion aldò pra la mudaliteies de ejam. Chësta ie na dezijion mpurtanta, ajache la ie de scunanza per la particularità dla scola di luesc dla valedes ladines", auza ora l assessëur provinziel Daniel Alfreider. I mudamënc va n droa cun l ann de scola 2025/26 y va a sustituì la regulamentazion dl ann 2018.

"Cun la regulamentazion nueva renfurzons chëla cumpunëntes che ie tipiches dla realtà de furmazion tla provinzia de Bulsan: standards prufesciunei scialdi auc y l liam scialdi strënt danter furmazion, svilup persunel y respunsabltà soziela. Nscila iel n svilup sun mesura nce di tëmps dl sistem de ejam, zënza che la particulariteis de nosta autonomia vede perdudes", spiega l assessëur provinziel tudësch Philipp Achammer.

Nce per l assessëur Marco Galateo se tràtel tlo de na atualisazion mpurtanta: "La regulamentazion nes lascia pro de mantenì la ravises raiuneles de nosta realtà furmativa, dantaldut tl renfurzamënt dl elemënt distintif strategich de nosta scola. Cun chësc ulons njenië ca nosta jëunes y nosc jëuni per si daunì, ti dajan inant cumpetënzes che ie de mpurtanza per l mond de lëur o per l stude."