La Jonta provinziela va inant cun l svilup dla ntlujion te scola

La Jonta provinziela dà pro l pachetl de mesures per la ntlujion scolastica - I assessëures per la furmazion rejona de n var sterch de svilup

BULSAN (USP) L crësc la cumpëida di sculeies y dla sculées che à debujën de n sustëni ndividuel tl nseniamënt. Per ti vester a chësta ndesfideda, ma oradechël nce per auzé la cualità dl cumpaniamënt a n livel nuef, à la Jonta provinziela, per scumenciadiva deberieda di trëi assessëures per la scola y furmazion Philipp Achammer, Marco Galateo y Daniel Alfreider te si senteda di 28 de agost, dat pro la diretives per l pachetl de mesures per la ntlujion te scola. L ie l scumenciamënt per n svilup mirà dl ciamp dla ntlujion, che dëssa njenië ca bën la scoles per i ani che vën.

Dezijions de referimënt per la scoles de Südtirol

Daniel Alfreider, assessëur provinziel per la scola y l'educazion ladina, auza ora l ciamp de azion nuef che vën a s'l dé tres l mudamënt: „Ntlujion vëniel a s'l dé l miec ulache l vën tëut dezijions l plu che la va daujin ai sculeies y ala sculées. Sce la scoles giapa plu mesuns de manejamënt y possa se nuzé dla ressurses te na maniera plu efiziënta, renfurzea chësc si capazità de fé y ti va ala fin dla finedes a bën di mutons/mutans y di/dla jëuni/jëunes.“

„L pachetl de mesures cu-sustenì dala Jonta provinziela à laite dezijions mpurtantes de viers de nosta scoles,“ sotrissea Philipp Achammer, assessëur per la furmazion tudëscia. Cun chësc pachetl de mesures giaurions n capitul nuef dla ntlujion te scola. L ne se trata nia de adatamënc puntuei, ma de n var fundamentel de svilup. Nëus nvion via te si lëur sibe l personal che nce la maniera de furmazion y ala fin dla finedes la urganisazion aldò dl bujën efetif de sustëni di mutons/dla mutans y di jëuni y dla jëunes.“

L assessëur provinziel per la scola y furmazion taliana, Marco Galateo, sotrissea la mpurtanza dl manejamënt struturel nuef: „Cun na tle nueva per calculé se nuzeràn dla ressurses persuneles propi ulache les va debujën. I adatamënc de chësc viers tën cont di bujëns che se à mudà tla scoles y ie nscila na fundamënta sterscia per n lëur de ntlujion cualitativamënter bon, che dëssa renfurzé dassënn la scoles tla vita te si atività di per di. Ulon ti dé plu segurëza ala scoles, renfurzé l personal y nvestì te si cualificazion."

Plu personal, n curs de furmazion persunel, plu lerch de manejamënt

L mudamënt struturel á si fundamënta tla strutures y ativiteies dezijiuneles de njenië ca l personal y ti dé nscila i mesuns a d’ël per na urganisazion a puntin. La tle ie chëla de auzé do y do la cumpëida di nsenianc de ntegrazion te n prugram de trëi ani, dal 2027 inant, cun la tle dl personal per la cumpëida de stieres di nsenianc y dla nseniantes de ntegrazion che se urientea deplù ai bujëns de sustëni di sculeies y dla sculées.

Per ti vester ala mancianza sterscia de persones cualifichedes tl ciamp dla ntlujion vëniel oradechël svilupà n curs de furmazion sun mesura per chëi y chëles che zapa ite zënza avëi laurà bele dant, ma nce per nseniantes y nsenianc de materies pratiches che à bele esperienza y che lëura tl ciamp dla ntegrazion do che i ie zapei ite tres cherdeda ndrëta.

Tl medemo mumënt vëniel urganisà da nuef la gestion dla ressurses. Dal ann de scola 2027/28 inant ti uniràl sëurandat diretamënter la stieres dla/di cunlauradëures de ntegrazion tla cumenanzes raiuneles y tla direzions dla scoles. Chësc ti lascia pro ala scoles na miëura planificazion, che se urientea te na maniera flescibla aldò dla situazion y di bujëns cuncrec di sculeies y dla sculées. Nscila iel nce plu saurì a planifiché la situazion prufesciunela ndividuela dla y di cunlauradëures per la ntegrazion.

Cun l pachetl de mesures mët la Jonta provinziela de Bulsan a jì la fundamënta per na ntlujion che se urientea mo deplù ai bujëns di mutons y dla mutans, di jëuni y dl jëunes. La finalità ie chëla de ti pité a duc i sculeies y a duta la sculées la miëura cundizions per pudëi fé pea y avëi suzes tl'educazion.