La Provinzia fej nvestimënc te n spedel provinziel segur

La Provinzia sotrissea coche l ie unì arjont de plu traverc PNRR – L spedel de Bulsan ie plu segur tl cajo de tremot, oradechël iel unì metù ite plu liec tla ntensciva

BULSAN/MARAN/PERSENON/BURNECH (USP) Canche la se fej sceria muessa l’assistënza sanitera mantenì chël che la mpermët: segurëza, aiut aslune y assistënza da pudëi se n lascé lessù. Propi de chësc viers se muev y lëura la Provinzia y arjonj śën sasc milieresc dl plann naziunel de recostruzion PNRR y dl plann cumplementer njuntà PNC. L assessëur provinziel per la sanità Hubert Messner à ai 27 de merz metù sun mëisa dla Jonta provinziela de Bulsan la deliberes che mostra su che i traverc ie unii arjonc. “La mesures renfurzea la segurëza ti spediei, miurea l’assistënza dla pazientes y di pazienc y nce la cumpetënza di derijënc tl ciamp dla sanità,” dij l assessëur per la sanità Messner. 

N suzes mpurtant: l’ela ovest dl spedel de Bulsan, la “Tor Cuecena” coche n ti dij, ie unì mudernisà y derturà su, a na maniera che l sibe plu segur tl cajo de tremot.

I ntervënc per chësta finamira ie ntant finei y nce ufizialmënter recunesciui coche finei. N à dantaldut miurà la stabltà statica dl frabicat.”Nscila toca Südtirol pra la puecia provinzies dla Talia che ie stac boni de finé per tëmp y ëura y de arjonjer l travert aldò dla regules dates dant,” nscila Messner, che se dij dut ntëur cuntënt de chësc. De ndut vàl ite ntëur a 98 milions de euro tla mudernisazion. Na pert de chisc scioldi vën dala UE y dal Stat. Tres l PNRR y dl plann cumplementer njuntà PNC iel unì metù a despusizion de ndut 16 milions de euro.  

La gran pert di lëures vën finanzià cun scioldi dla Provinzia de Bulsan: “Cun chisc nvestimënc ne scunons nia mé mures, ma dantaldut jënt, che ie la pazientes, i pazienc y l personal che lëura iló,” nscila l assessëur per la sanità. 

Tl medemo mumënt iel unì fat che l sibe plu lerch per persones te situazions critiches de sanità. Cun l sustëni de mesuns dl PNRR iel te plu spediei sautà ora de avëi liec acuc sëuraprò cun njins de tré l fla. Mé tl cheder de chësc program iel, cun 28 liec ntenscifs y 21 liec sub-ntenscifs, unì miurà la situazion dal pont de ududa tecnich y struturel. “Cun n var ndolauter sarà la Provinzia bona de arjonjer la ndicazions dl Stat, per ruvé a 77 liec ntenscifs. Chësc renfurzea l’assistënza, nia mé a Bulsan ma nce ti spediei de Maran, Persenon y Burnech, da coche spiega l assessëur provinziel Messner. 

Nvestimënc iel nce unì fat ti cëves. N’autra delibera PRNN cunfermea che l travert ie unì arjont pra la furmazion di managers: 43derjënc tl ciamp dla sanità à finà via cun suzes cursc de 200 ëura prun. I cursc ie unii metui a jì deberieda cun la Università Liedia de Bulsan, per dé inant cumpetënzes tl management y tl digitel, per n’assistënza moderna y metuda ite te na rë. 

Duta la mesures ie pert dla Miscion 6 „Sanità” dl plann naziunel de resilienza PNRR.