Lascé de fumé: la Provinzia renforza l sustëni

Dal 2027 inant na streda unitera per l'assistënza per lascé de fumé – L sarà plu saurì a ti jì permez al aiut prufesciunel, da coche l vën ora dala deliberazion dla Jonta provinziela de nstadì

BULSAN (USP). Chiche ulëssa lascé de fumé dëssa tl daunì giapé plu saurì aiut prufesciunel. La Jonta provinziela de Bulsan à regulà da nuef la maniera y i mesuns per se dejusé dala dependënza dal fum. La dezijion ie unida tëuta ai 9 de utober. Da 1. de jené 2027 inant vélel a livel provinziel na streda de assistënza unitera y multidisziplinera che sustituësc la regulamentazion dl ann 2005.

"A lascé de fumé ne n'ie nia for saurì. N sustëni prufesciunel possa fé ora na desferënzia mpurtanta,"dij l assessëur per la Sanità Hubert Messner. "Perchël alesirons l mesun per ti jì permez al servisc y meton mpe na uferta unitera a livel provinziel che ie urienteda ai bujëns ndividuei dla jënt," spiega Messner.

Tl ann 2025 iel te Südtirol unì curà 321 persones tl cheder de n prugram per lascé de fumé. L prugram ie pensà per persones sëura i 15 ani che ulëssa lascé de fumé o smendré si cunsum de tabach o de nicotina. L tol ite, dlongia la zigaretes, nce e-zigaretes, prudoc de tabach sciaudei y d'autri prudoc de nicotina.

Plann de terapia ndividuel per chiche ie tucà

L ie preudù na streda de cura y de assistënza nueva y unitera: tl scumenciamënt valutea esperc la situazion persunela n con' dl livel de dependënza y dla mutivazion. Sun chëla vëniel pona metù ju deberieda cun i nteressei y la nteressedes n plann de terapia ndividuel. Chësc possa tò ite cunsulënza, sustëni psicologich, scencajo psicoterapia o la prescrizions de medejines aldò. De regula iel preudù da ot nchin a diesc terminns, coche nce cuntroi do trëi, sies y dodesc mënsc. Nsci vëniel regularmënter analisà y valutà ciun che ie l svilup y l livel de suzes per ti vester nce a mumënc ulache n pudëssa tumé de reviers tla dependënza.

I servijes saniteres preudui y scencajo l mesun de tò ite medejines vën pitei tl cheder de chësta azion de assistënza strutureda. "I pazienc y la pazientes ie nscila liei al acumpaniamënt, al cuntrol y al'assistënza prufesciunela," sotrissea Messner.

Per persones residëntes te Südtirol coche nce per chiche ie scrit ite tl Servisc Saniter provinziel sarà i servijes saniteres preudui dal 2027 inant azescibli zënza ticket tl cheder di troies de assistënza. Nchinamò fòvel iusta mé da paië pea 36,15 euro, i jëuni sot ai 18 ani ne ova nia drë' de paië.

Ti jì permez iel mesun sibe tres scumenciadiva persunela che nce tres cunsëi dl dutor y tres i servijes saniteres y soziei. Chiche va diretamënter te na sënta dla rë provinziela ne à nia debujën de na rezeta dal dutor.