"La prufesciunela" de Gherdëina mët a jì l percurs de cater ani

Dal ann de scola 2026-2027 inant passerà la tlasses de Ziplé y scultura tl lën y Policromatura y decurazion pitorica dla scola prufesciunela dal percurs da śën de trëi ani a n percurs de cater ani

BALSAN (USP). La dezijion vën ora dal'analisa di dac dl sistem nfurmatif di sculeies y dla sculées "Popcorn", che à lascià udëi coche passa l 80% dla studëntes y di studënc dla scola prufesciunela fej inant si furmazion nce ntan l cuarto ann, arjunjan nsci l diplom de furmazion prufesciunela.

Sëuraprò à i dac mustrà su na majera sauridanza de jì ite tl mond dl lëur per i sculeies che fina l cuarto ann de furmazion, permez a chëi che fina l percurs ala fin dl terzo ann. L mudamënt dl percurs de cater ani respuend nsci sibe ala tendënza bele desmustreda dai sculeies de jì inant cun la furmazion, ma nce al bujën de pité na preparazion plu adateda ala dumandes dl marcià dl lëur.

"Chësta deliberazion nasc da na analisa cuncreta di dac che reverda i percursc de furmazion di sculeies. La cumpëida desmostra che jì inant cun la furmazion nce per n cuarto ann ie bele na realtà cunsulideda. Passan al percurs furmatif de cater ani ulons nscila ti dé na resposta cuerënta a chësc bujën, ti pitan a nosc jëuni y a nosta jëunes na preparazion mo plu sterscia y de majera upurtunità de azes cualificà ite tl mond dl lëur," sotrissea l assessëur provinziel Daniel Alfreider.

La diretëura Maria Teresa Mussner dij che "l percurs nuef de cater ani lascerà perchël pro de adaté l'uferta de furmazion ala realtà che ie bele unida a s'l dé danter i sculeies, valorisan la cuntinuità dl percurs de furmazion y l arjonjer dl diplom de furmazion prufesciunela".

Per i sculeies scric ite al mumënt al prim, segondo y terzo ann saràl nce preudù na norma de transizion che lascerà pro, sun dumanda, de giapé l diplom de cualifica prufesciunela ala fin dl terzo ann.

La reurganisazion ie n var deplù per renfurzé la furmazion prufesciunela tl artejanat artistich y tl lëur de lauré l lën, ciamps che ie na pert mpurtanta dla tradizion y dl'identità de Gherdëina.