La utia de Nscisles: nvestimënt de passa 10 milions de euro

Sun pruposta dl assessëur Christian Bianchi à la Jonta provinziela dat pro l program plann-volumetrich y la prenutazion di scioldi per tré ju y fé su da nuef la utia de Ncisles

BULSAN (USP). La Jonta provinziela à dat pro l program plann-volumetrich per tré ju y fé su da nuef la utia de Ncisles, (per talian Rifugio Firenze, per tudësch Regensburgerhütte) n frabicat alpin storich te Gherdëina. La utia te Ncisles, fata su tl 1888, ie una dla uties storiches dla Dolomites. Dal 2010 incà iela de avëi dla Provinzia Autonóma de Bulsan.

L ntervënt prevëija n nvestimënt de de ndut 10,45 milions de euro y lascerà pro de njenië ca la strutura cun standards moderns n con' dla segurëza, dla sustenibltà ambientela, dla funziunalità y dla cualità dl'uspitalità,“ da coche sotrissea l assessëur provinziel per la Opres publiches y Valurisazion dl Avëi Christian Bianchi.

L cuntrol tecnich y l stude de fatibltà nciarià dala Provinzia à auzà ora coche i frabicac che ie śën ebe critiziteies statiches y nce critiziteies dal pont de ududa dl meldefuech y ne sibe nia plu aldò dla normatives n droa. Dal'analisa iel nce unit ora che n ntervënt de ressané defin dut cant ne fossa nia sustenibl dal pont de ududa tecnich y ecunomich. Perchël iel unì cris ora la soluzion che prevëija de tré ju la strutures che ie bele y de fé su n frabicat nuef cumpat.

La utia nueva unirà fata dantaldut de lën, nterpretan da nuef l'architetura dla uties tradiziuneles da mont. L pruiet tol nce ite sistems de energia sustenibli, danter l auter n mplant fotovoltaich y n mplant da pellets, y prevëija na capazità de albierch de 79 liec cun sëurapro zirca 308 metri cuadrac de sperses azesciories.

„Cun chël che la utia de Ncisles unirà fata su da nuef saràl mesun cunservé si valor storich y de cuntreda, garantian tl medemo mumënt la funziunalità plëina y l anuzamënt tl daunì da pert dla generazions de chiche va da mont su i a a crëp,“ da coche à njuntà Bianchi.

Cun la deliebra data pro à la Jonta provinziela nvià via la fases de pruietazion y realisazion di lëures, dijan che l finanziamënt de dut l ntervënt ie dessegur garantì, tres la ressurses bele da garat tl bilanz provinziel.