Le Zënter mobil pormët da fá i controi tecnics di auti y di motors

L’assessur Alfreider sotrissëia che i stromënc de control y le personal cualifiché rapresentëia investimënc mirá por sostigní les Forzes dl Ordin ti controi.

BALSAN (USP). Al ciafa forma le Zënter mobil por i controi tecnics di mesi de trasport nü. Le diretur dl Ofize Motorisaziun Markus Kolhaupt y le tecnich y agënt dla Polizia Stradala Roberto Terzariol ti l’á presenté al assessur provinzial ala Mobilité Daniel Alfreider y al diretur de Departimënt Martin Vallazza.

Le zënter mobil, n veicul arjigné ite aposta, ti pita ai tecnics dl Ofize Motorisaziun y ai agënc dla Polizia Stradala na postaziun de laur adatada por podëi fá i controi y les ativités aministratives diretamënter sön ur de strada.

“I stromënc de control y le personal cualifiché é investimënc mirá che i metun a desposiziun dles Forzes dl Ordin. A chësta manira sostignunse la Polizia, i Carabiniers y la Polizia de comun ti controi sön nostes strades, y renforzun deboriada la segurëza sön strada y la proteziun dles porsones”, á dit l’assessur Alfreider.

Tratan i controi tecnics vëgn i auti ispezioná por verifiché te ci condiziuns ch’ai vëgn efetivamënter adorá sön strada. Al vëgn controlé danter l’ater i montli, i spidli da odëi iadedô, i silenziadus d’aspiraziun y i ros dal föm. Gonot vëgnel abiné auti y motors che, por gauja de mudaziuns tecniches, ne stá nia ite ti limic de vera conzedüs, o che ne respetëia nia les normes de lege.

Markus Kolhaupt y Roberto Terzariol ti á splighé al assessur provinzial Alfreider y al diretur de Departimënt Vallazza düc i stromënc dl auto y sciöch’ i intervënc de control se desfira. L’obietif é chël da ciafé fora te na manira sigüda i defec tecnics y da trá zoruch sistematicamënter dal trafich i mesi che ne tëgn nia ite les normes.

L’ativité de control tecnich vëgn dagnora fata en colaboraziun cun na unité competënta dles Forzes dl Ordin. Tratan l’isté se conzentrëia l’atenziun sön i controi dles strades di jus. Da d’altonn gnarál ince metü en funziun le post de control fis a Sterzing, renforzan ciamó deplü l’ativité de control.