Lëur zënza cunfins: prejentà l pruiet dla Borsa de lëur dl’Euregio

L pruiet ie unì prejentà deberieda: per l prim iede iel mesun crì da lëur y cunsulté anunzies te duta l’Euregio: intercunescion di portai de lëur dl Tirol, dla Provinzia de Bulsan y dl Trentin

DISPRUCH (USP). Publiché y abiné anunzies de lëur tl Tirol y nce tla provinzies de Bulsan y de Trënt zënza messëi cunsulté trëi portai desferënc: chësc ie preudù tl pruiet Borsa lëur Euregio. De gra ala intercunescion tecnica dla trëi plataformes alle jobs (Austria), eJoblavoro (provinzia de Bulsan) y Trentino Lavoro (Trentin), iel śën mesun crì y publiché dunfiertes de lëur nia mé tl raion de uniun, ma te duta l’Euregio.

L pruiet ie unì prejentà ai 27 de auril tl Palaz dl Land Tirol a Dispruch. La funzion nueva ie unida ativeda sun i portai dl lëur cun la prejënza dl presidënt dl’Euregio y cumandant dl Tirol Anton Mattle, dl presidënt dla Jonta provinziela de Bulsan Arno Kompatscher y dl vizepresidënt trentin Achille Spinelli, deberieda cun l’assessëures Astrid Mair (Tirol) y Magdalena Amhof (Südtirol). Prejënt nce Johannes Kopf, presidënt dl’AMS (Servisc marcià de lëur) Austria, che à desmustrà dut si ntujiasm per chësta upurtunità nueva.

“Cun l’Euregio ulons fé a na maniera che la sëida danter Tirol, Südtirol y l Trentin ebe n rodul y n pëis for manco y manco relevant tla vita da uni di y ti cëves dla jënt. La Borsa lëur Euregio reprejënta n var mpurtant per renfurzé sëuraprò l barat y la cunlaurazion tl marcià dl lëur,” à sotrissà Mattle.

Kompatscher se à dit cuntënt che “la Borsa lëur Euregio, un di resultac prinzipei dla presidënza de Südtirol, sibe śën unida metuda n droa cun suzes: n marcià de lëur deberieda devënta nscila cuncretamënter da tuché cun mans sibe per i zitadins y la zitadines che per la mprejes.

La plataforma gëura pusciblteies nueves per la mprejes canche les va a crì personal cualificà sëura la sëides provinzieles y raiuneles ora, renfurzan nscila la cumpetitività de nosta ecunomia tl’Euregio,” à njuntà Spinelli.

 Coche l funziunea

I utënc jirà inant a crì da lëur tres i portai provinziei, sciche for. La nuvità ie che la dunfiertes de lëur di autri raions dl’Euregio unirà vijualisedes automaticamënter deberieda a chëles dl raion. Nce la mprejes puderà publiché si anunzies, nsci coche zënza, ma arjunjan candidac y candidates te duta l’Euregio.

“Cun mé un n clic ruva i marcëi de lëur dl’Euregio adum. On slargià ora nosta app 'alle jobs' nce ala dunfiertes de lëur de Südtirol y dl Trentin, y meton a despusizion de nosc ujins 8.000 dunfiertes de lëur dl Bundesland Tirol. L’Euregio devënta nscila dut ntëur n drë’ marcià dl lëur deberieda,” à dit l presidënt dl’AMS (Servisc marcià de lëur) Austria, Johannes Kopf.

L team de pruiet ie cumpletà da Stefan Luther, diretëur dla Repartizion Servisc Marcià dl Lëur dla Provinzia de Bulsan, Bernhard Pichler, diretëur dla Repartizion Servijes per la mprejes dl’AMS Tirol y Stefania Terlizzi, derijënta generela dl’Agentura dl Lëur dla Provinzia de Trënt.

Deplù nfurmazions iel da abiné sun la plata internet aposta.