Lëures y mesuns de furmazion ie tl focus

La edizion dla Fiera de Furmazion Futurum ie dai 18 nchin ai 20 de setëmber tla sënta dla Fiera de Bulsan. Tl medemo mumënt iel nce l campiunat provinziel di mestieres y "Meet the Companies"

BULSAN (USP). Ciun mestier o ciuna furmazion passenea pa pra mé? Y ulà possi pa studië cie? Per cumpanië y cunsië la jëunes y i jëuni tla dumandes dla vita che se taca ite te chësc ciamp, mët l Ufize provinziel per la Cunsulënza tla Furmazion y tl Lëur tla Repartizion provinziela dl Sustëni tla Furmazion à jì chëst ann, tl 2025, bele per l 10. iede la Fiera Futurum.

De ndut 54 scoles y 42 scoles autes, la Nfurmazion per l Stude de Südtirol, reprejentanc di studënc, stonc de cunsulënza y lies di jëuni dà te chësta ucajion nfurmazions n con’ de si uferta furmativa de scola y de lëur. La fiera ie dai 18 nchin ai 20 de setëmber.

"Cun la Fiera de Furmazion ons metù a jì n mesun straurdiner per prejenté duta la paleta dl’uferta de furmazion y de furmazion permanënta, ti dajan ala jëunes y ai jëuni n sustëni mpurtant per tò pona si dezijions," da coche à auzà ora Philipp Achammer, assessëur provinziel per la furmazion y scola tudëscia n ucajion dla prejentazion dla 10. edizion dla Futurum. Nce l assessëur per la furmazion y scola taliana Marco Galateo y l ntendënt ladin Heinrich Videsott à auzà ora la mpurtanza de na tel uferta d’uni sort: "Per crì ora n lëur a puntin vàl debujën de na dezijion balanzeda. Y tlo possa propi la Fiera Futurum vester n bon aiut per tò la drëta dezijion," nscila Videsott. Dui trëi i espunënc istituziunei à nvià dantaldut la families de se nuzé de chësta uferta, per se fé n cheder dla gran uferta che l vën pità. 

Uferta ntlujiva per jëuni y families

N focus tematich ti vëniel metù ala furmazions tl ciamp de MINT, l acronim tudësch che ie per matematica, nfurmatica, scienzes natureles y tecnica (“Mathematik, Informatik, Naturwissenschaft und Technik” - MINT). Sculées y sculeies che va te na scola mesana, auta o prufesciunela possa se nfurmé y se fé n cheder danman dla sortes de scola, di mesuns de furmazion y dila lueges de stude. Nce genitores, nsenianc y nteressei per la furmazion permanënta ie nviei de cuer.

Madiadëures ntercultureles/ei à per l’ucajion laurà ora na uferta particulera per spanuel, arabich, urdu y albanes per i jëuni cun n background de migrazion, ma nce per si genitores. Chësta ti vën piteda n sada ai 20 de setëmber danmesdì, dala 10.00 inant. Vijites menedes iel nce per tudësch y talian. "Cun chësc ulons chëst ann renfurzé l carater ntlujif dla Fiera. Ajache messon ti ruvé permez nce ai genitores che ne n’ie nia boni de se deriejer te na uferta tan lergia," da coche à auzà ora la diretëura dla Repartizion Sustëni tla Furmazion Rolanda Tschugguel. Per l prim iede iel tlo unì laurà ora n cudejel tla Rujeneda Saurida. Nuef ie la prejënza pra la Futurum de Colegs dl Tirol y de plu “Istituti Tecnici Superiori (ITS)”. Chisc pieta nce na streda furmativa che scumëncia do l ejam de maduranza y che à n carater sterch de njenië ca al lëur.

La 10. Fiera de Furmazion Futurum vën giaurida

n juebia ai 18 de setëmber

dala 10.30

tla Fiera de Bulsan

Plaza dla Fiera 1 a Bulsan.

La ie davierta debant da n juebia ai 18 nchin a n sada ai 20 de setëmber dala 8.30 nchin la 16.30, per duc i nteressei. N sada ai 20 de setëmber iel dala 18.00 oradechël la premiazion WorldSkills.