Messner tl Raiun Sanitar da Picolin: “Assistënza ejemplara”

Tratan n surapost tl Raiun Sanitar dla Val Badia, a Picolin, á lassessur provinzial Messner laldé le bun laur de assistënza y la motivaziun dl personal.

PICOLIN/SAN MARTIN DE TOR (LPA). L’assessur provinzial ala Sanité Hubert Messner, adöm al diretur dl departimënt Michael Mayr y azacontan de rapresentanc dl assessorat provinzial ala Sanité y ai Sorvisc sanitars, é jü a vijité y a baié cun le personal dl Raiun sanitar dla Val Badia, a Picolin/San Martin de Tor n cunt dla situaziun dla sanité aldedaincö tla Val Badia.

“I ti dëis n contribut dër prezius ala prevenziun, che é le dagní, deache l’atenziun dess gní spostada dal sistem de ospedalisaziun ala sanité preventiva” á sotrissé Messner. En general él important da fá rëi y da colaboré tres damí: i zëntri comunitars, i sorvisc sanitars y sorvisc soziai é gnüs cheriá cun chësta finalité.

La Val Badia vëgn aratada n model de cures paliatives söl teritore cun teams interdisciplinars de assistënza che vá a ciafé les porsones te ciasa, á alzé fora l’assessur provinzial Messner. Ince l’assistënza integrada te ciasa é svilupada bun, avisa sciöch’ l’assistënza incër la familia y les vijites preventives te ciasa che funzionëia bun, á dit Messner cun sodesfaziun.

Ince le coordinadú sanitar Marco Pizzinini y la responsabla dl sorvisc infermieristich Maddalena Trebo á alzé fora che le distret dla Val Badia pita sorvisc ejemplars, y che i zitadins y les zitadines dá jö tröc iudizi positifs, dantadöt por ci che reverda les cures paliatives. Al é ciamó lerch por mioré la digitalisaziun y la logistica di produc sanitars. Döt adöm é la colaboraziun tl Raiun sanitar dër buna, ince cun i doturs de basa, á dit Trebo, injuntan che la domanda de prestaziuns sanitares te Südtirol resta dër alta.

“Tl sistem sanitar dl Südtirol él indöt 432 azesc ala assistënza infermieristica te ciasa: na zifra da primat! Chi che laora söl teritore fej döc y dötes adöm n gran bun laur” á laldé Messner. L’assessur provinzial á ince manifesté süa ligrëza por la gran motivaziun di dependënc dl setur sanitar, y á detlaré che la Provinzia á investí 35 miliuns de euro por mioré i paiamënc di prësc 6.000 dependënc dles profesciuns sanitares. La Provinzia laora ince inant sön la digitalisaziun, sides cun n sistem de informaziun unitar por i ospedai, che cun la cherta sanitara eletronica EGA, che vel sciöche “cufer digital” por düc i dac sanitars di zitadins y dles zitadines.