Monn ladin plüra Franz Vittur, protagonist dla scora y cultura ladina

Le monn ladin plüra la mort de Franz Vittur, figöra de referimënt dla scora, dla cultura y dla valorisaziun dl lingaz ladin

BULSAN (LPA). Porsona de n profil uman y profescional dër alt, s’ál dé jö cun costanza y cun artëgn por le bëgn dles istituziuns scolastiches y culturales ladines. Dal 1975 inant, sciöche pröm intendënt, ál salpü da ti dé vita, strotöra y organisaziun ales profescionalités y ai ofizi dla Intendënza scolastica ladina impormó nasciüda. Cun so ester otimist y idealist, ál dagnora chirí le dialogh y la concordia, tolon ispiraziun dai valurs umanistics ch’al partî deplëgn.

Por sü tröc y bugn miric, é Franz Vittur gnü premié dan da püc mëisc cun le pest “Merit ladin”, na onoranza ch’al ess messü pié do de setëmber, en gaujiun dl “Di dla cultura ladina” a Urtijëi.

Fondamentela é stada süa opera de mediaziun tla fasa de scomenciamënt dla scora ladina y de so model paritetich, mo ince so impëgn costant por la promoziun y la valorisaziun dl lingaz y dla cultura ladina. Dlungia le rode istituzional, á Vittur lascé n sëgn sot ince sciöche autur y promotur cultural, portan pro - te na manira significativa - a ti dé visibilité y prestisc al lingaz ladin.

L’assessur provinzial Daniel Alfreider á comuniché so desplajëi personal, y á recordé l’impëgn lunch de Franz Vittur al sorvisc dla comunité ladina: "Vittur ti lascia a döta la comunité ladina n’arpejun dër preziosa, fata de sorvisc, de impëgn costant y cosciënt, de competënza y de umanité. Le monn dla scora, en particolar, é reconescënt por le contribut straordinar che, da maester impröma, da diretur y intendënt dedô, ál salpü da ti dé tratan i 47 agn dedicá al insegnamënt y ala direziun. Por chësc ti sunse dër reconescënc y i tignarun alalt - cun respet y amiraziun - so ejëmpl y süa arpejun."

Ince le Diretur dl’Intendënza y Cultura ladina André Comploi á orü recordé chësta personalité: "Cun la mort de Franz Vittur perd le monn ladin un de sü protagonisć plü importanc. So impëgn, süa vijiun y süa dediziun sterscia por la scora, le lingaz y la cultura ladina rapresentará inant n ejëmpl por les generaziuns che vëgn docá."

Döta la comunité ladina é unida tl recort de Franz Vittur y ti dij n gran dilan por l’arpejun umana, culturala y profescionala ch’al lascia zoruch.