Mudamënt dl plann urbanistich per la zircumvalazion de Sëlva

La trassa dla zircumvalazion de Sëlva de Gherdëina vën cumededa y limeda aldò de coche la pruietazion cuncreta se l damanda: n presupost de planificazion per la proscima fasa dl pruiet.

BULSAN/SËLVA (USP). L pruiet dla zircumvalazion de Sëlva fej mo n var inant. Sun pruposta dl assessëur provinziel per la Scunanza dl Ambient, dla Natura y dl Tlima y per l Svilup dl Raion Peter Brunner à la Jonta provinziela nvià via l pruzedimënt ufiziel per mudé l plann urbanistich. L ubietif ie chël de adaté l plann urbanistich al status quo de pruietazion per coche l pruiet nfrastruturel ie ntant unì svilupà te na maniera plu a puntin tres la cuordinazion dl assessëur provinziel per la Nfrastrutures y la Mubltà Daniel Alfreider.

Cuncretamënter iel preudù de spusté l trëbe Ovest per jì ite de zirca 115 metri de viers de ovest. Tl trëbe Zënter iel śën preudù n rundel mpede la ncrujeda da śën a forma de T; nce chësc cunliamënt unirà spustà de zirca 25 metri de viers de ovest. "A chësta maniera se ntegrea la trassa ite miec tl cuntest de cuntreda y tl medemo mumënt vëniel miurà l cunliamënt dla zircumvalazion cun la rë dla stredes che ie bele," sotrissea l assessëur Peter Brunner.

L assessëur Daniel Alfreider njonta: "Nëus purton inant l pruiet var per var. Ntant ie la pruietazion unida scialdi plu cuncreta y ie na fundamënta sterscia per la proscima dezijions." La finamira ie de alesiré l zënter abità dal trafich de chëi che passa mé via y tl medemo mumënt de auzé la segurëza sun streda, l mesun de ruvé permez y la cualità de vita te Sëlva te Gherdëina.“

Bele de merz dl 2026 ova la Jonta provinziela definì la carateristiches tecniches per la zircumvalazion de Sëlva. "Per n pruiet de chësta dimenscions saràl debujën de n cufinanziamënt statel. N muessa śën jì ju a Roma per abiné i presuposć per pudëi finanzië chësta nfrastrutura," dij Alfreider.

La zircumvalazion preududa se sviluperà da ora La Poza nchin ite te Plan y arà doi tuniei, un dal inuem "La Sëlva" l auter dal inuem "Ciampinoi", for aldò dla luegia ulache i ie. Oradechël vëniel fat trëi puenc per i cunliamënc aldò ala stredes. De ndut uniràl fat na zircumvalazion de zirca 2,8 chilometri. Sëuraprò vën la lueges di doi tuniei y dla vies per mucé fates aldò dla prescrizions de segurëza atueles coche nce di resultac dla nfruscedes, tuedes y nrescides geologiches y sismiches.

"Cun l pruzedimënt nvià via ncuei metons la fundamënta per i presuposć urbanistics, acioche la trassa ajurneda posse unì tëuta su tl pruiet," stluj ju Brunner te si tëuta de posizion. Do la deliberazion unirà la documentazion n con' dl mudamënt dl plann urbanistich data ju y metuda a despusizion dl publich per 30 dis alalongia.