N'acurdanza nueva regulea la cunlaurazion danter la scoles de mujiga

I assessëures provinziei Alfreider y Achammer sotscrij n'acurdanza de cuordinazion danter la Direzion de Furmazion Ladina y Tudëscia y la Direzion provinziela dla Scoles de Mujiga Tudësces y Ladines  

BALSAN (USP). I assessëures provinziei Daniel Alfreider y Philipp Achammer à sotscrit na acurdanza nueva de cunlaurazion danter la Direzion de Furmazion y Cultura Ladina, la Direzion de Furmazion Tudëscia y la Direzion provinziela dla Scoles de Mujiga Tudësces y Ladines. La se taca ite al'acurdanza dl 2012, cun chëla che la Direzion dla Scoles de Mujiga ti luesc ladins ti ie unida sëurandata al setor dla scoles de mujiga tudësces y regulea da nuef la formes de cunlaurazion danter i ciamps de furmazion che fej pea.

L'acurdanza prevëija regularmënter ancuntedes de cuordinazion danter la Direzion de Furmazion y Cultura Ladina, la Direzion de Furmazion Tudëscia y la Direzion provinziela dla Scoles de Mujiga Tudësces y Ladines. Tlo vëniel cuordinà deberieda l svilup dl ciamp de furmazion mujighela te Südtirol y la cuestions spezifiches dla scoles de mujiga ladines. La tematiches tratedes à danter l auter da n fé cun la particulariteies ladines ti programs de nseniamënt, cun la planificazion dla scola, l manejamënt dla ressurses persuneles y finanzieles y cun i pruiec deberieda.

N auter azënt ie chël de renfurzé la cunlaurazion danter scoles y scoles de mujiga ti luesc ladins, per ejëmpl tres pruiec de mujiga deberieda o d'autra formes de cunlaurazion. L'acurdanza sotrissea nce la finamira deberieda de fé udëi y de purté inant la rujeneda ladina. La Ntendënza y Cultura Ladina sustën tlo la Direzion provinziela dla Scoles de Mujiga Tudësces y Ladines te cuestions de rujeneda.

L assessëur provinziel Daniel Alfreider sotrissea che "la scoles de mujiga ladines ie na seva mpurtanta de nosta realtà educativa y culturela y da 50 ani incà na pert da ne pudëi nia tralascé tla vita de truepa families te nosta valedes. Cun chësta acurdanza cialons che si lëur y si svilup vënie cuordinà danter la direzions de furmazion y la direzion provinziela dla scoles de mujiga tudësces y ladines. Tl medemo mumënt supions la cunlaurazion de chisc ciamps de furmazion a bën de duta la pertes y renfurzon la prejënza dla rujeneda ladina nce tla scola de mujiga."

L assessëur provinziel Philipp Achammer auza ora che "l'educazion y furmazion mujighela viv de na bona cunlaurazion y de strutures che respetea la particulariteies linguistiches y cultureles de nosta provinzia. Cun chësta acurdanza ons metù su na fundamënta de crëta per la cunlaurazion danter i ciamps dla furmazion, renfurzan tl medemo mumënt la cundizions de curnisc per l svilup deberieda dla scoles de mujiga ladines".

L diretëur per la Furmazion y Cultura Ladina André Comploi sotrissea che "la scoles de mujiga ladines à ghiranzes spezifiches che se damanda n manejamënt y n mpëni particuler. Tl medemo mumënt àles na sinergia sterscia cun la scoles de mujiga tudësces tla direzion provinziela dla scoles de mujiga tudësces y ladines, y nia mé a livel de urganisazion. L'acurdanza nueva ie na fundamënta sterscia per se baraté ora regularmënter y n manejamënt for deberieda. La cunlaurazion bele scialdi bona cun la Ntendënza Tudëscia y la Direzion provinziela dla Scoles de Mujiga Tudësces y Ladines, de chëla che rengrazie de cuer, renfurzons nscila inant y la seguron nce per l daunì."

La mpurtanza dl barat reguler sotrissea nce l diretëur de furmazion Gustav Tschenett: "N bon lëur de furmazion nasc ulache l vën unitant metù adum pruspetives desferëntes. L'acurdanza ie perchël na fundanënta de cornisc sun chëla che n possa se lascé, la renfurzea l’acurdanza reziproca danter i ciamps de furmazion y nes juda a tenì cont sistematicamënter di bujëns particuleres dla scoles de mujiga ladines."

N con' dl'acurdanza per l lëur mujighel-pedagogich danman, ti luesc, auza la diretëura provinziela dla Scola de Mujiga Tudëscia y Ladina Alexandra Pedrotti ora: "L'acurdanza nes dà l mesun de svilupé mo plu a puntin la scoles de mujiga ladines y de svilupé la cunlaurazion cun la scoles dl raion. Nscila vëniel per la sculées y i sculeies a s'l dé upurtuniteies sëuraprò de viver la mujiga, de vester criatifs deberieda y tl medemo mumënt de se nuzé ativamënter dla rujeneda ladina."