N lunesc scumëncel inò la scola: dac y cumpëides

N lunesc ai 7 de setëmber scumëncel per i mutons y la mutans dla scolina y dla scoles elementera, mesana y auta l ann de scola nuef 2026/27

BULSAN (USP). De ndut 64.749 mutons y mutans va tl proscimo ann academich a scola te una dla istituzions de furmazion tudësces te Südtirol. De ndut 10.883 mutons y mutans de scolina ie scric ite te na scolina tudëscia, ntan che 20.336 sculeies y sculées va te na scola elementera. Tla scoles mesanes de rujeneda tudëscia scumëncia 12.544 sculeies y sculées l ann de scola. Te na scola auta jiràl 12.286 jëuni y jëunes y 8.700 jëuni y jëunes va te na scola prufesciunela provinziela.

Per l assessëur Philipp Achammer iel tl scumenciamënt dl ann de furmazion nuef inò i mutons y la mutans tl zënter, cun si capaziteies y premetudes desferëntes: "N ann nuef de scolina y de scola cumporta for nce che n sibe curiëusc y che n ebe aspitadives y pusciblteies nueves," dij l assessëur Achammer. Dezijif iel che n cumpanieie uni mut y uni muta, cun empatia y metan for dassënn a verda a si vester ndividuel, ti dajan la drëta pusciblteies, unfat ciuna che ie la situazion persunela, per ti dé l mesun de se renfurzé te si recunescimënt de si capaziteies, che posse pona nce mo unì svilupedes: "Ajache na bona furmazion renfurzea i jëuni y la jëunes y ti dà la crëta de pudëi abiné y jì sun si streda," sotrissea Achammer.

Tla scolines y scoles dla valedes ladines iel unì scrit ite de ndut 2.895 mutons y mutans: 582 fej na scolina, 1.117 na scola elementera, 673 na scola mesana, 523 na scola auta o prufesciunela.

"La scola à na respunsabltà fundamentela: La muessa tré ite duc y dutes, ti pité a uniun y a uniuna l mesun de descuvierjer cosses nueves, de mparé y de se svilupé, de valurisé l talënt y la varietà y de crië na cumenanza ulache duc posse se sentì leprò,“ sotrissea l assessëur Daniel Alfreider: "Cun chësc ulëssi ti mbincé a duc i sculeies y a duta la sculées y a duc chëi y chëles che juda pea uni di cun mpëni y prufesciunalità a fé deventé la scola na luegia adateda per crëscer a livel ndividuel y soziel, de ancunteda y de cumpartezipazion n bon scumenciamënt dl ann de scola nuef," nscila Alfreider.

La Ntendënza y Direzion de Scola y Furmazion Taliana à prejentà nstadì ai 27 de agost a Bulsan dac y cumpëides per l ann de scola 2026/27 (l USP à repurtà). De ndut iel 22.080 sculeies y sculées scric/tes ite te istituzions de furmazion de rujeneda taliana te Südtirol.