Paiamënt dl TFR: l cuntrat per l personal provinziel ie dat pro

I prim paiamënc ie da se aspité de nuvëmber – L'assessëura Amhof prejënta n mudel nuef per l paiamënt dl TFR/tratatamënt de fin de raport y d'autra nuviteies per l servisc provinziel

BULSAN (USP). Sun pruposta dl'assessëura per l Personal Magdalena Amhof à la Jonta provinziela n vënderdi ai 2 de utober dat pro l cuntrat culetif nuef per l Servisc provinziel. Chësc fej nce unì su la cundizions per n paiamënt plu aslune dl tratamënt de fin de raport y dla premia de servisc. "Nsci fajons n var inant per la valorisazion dl servisc publich. I prufii prufesciunei mpurtanc vën renfurzei, y cun i tëmps scurtei per l paiamënt dl tratamënt de fin de raport vëniel śën cuncretisà na mesura tan aspiteda per i dependënc y la dependëntes publiches," sotrissea l'assessëura Amhof pra la cunferënza stampa do la senteda dl Guviern provinziel a Bulsan. 

Paiamënt dl TFR te 90 dis y te una na rata, scumencià vëniel de nuvëmber

Al mumënt aspieta tla Talia ex dependënc y ex dependëntes che ie ntant n pension suvënz 27 mënsc o deplù sun l paiamënt dl TFR. Cun l mudel nuef paia la Provinzia de Bulsan bele danora la somes che muessa vester, nchin che l INPS les mët a despusizion. Chësc uel dì che la somes unirà paiedes ora tl daunì tl tëmp de trëi mënsc. "L tratamënt de fin de raport ie de purtenienza di dependënc y dla dependëntes. L ie si scioldi che i se à davanià ntan si vita de lëur," sotrissea l'assessëura Amhof.

L diretëur de Ressort Günther Burger auza ora i truep lëures fac ti ani passei per nvië via dut cant y stlarësc i proscimi vares. Dan che l cuntrat possa jì n droa – bonamënter bele do i prims de nuvëmber - muessel unì zertificà dala Chëurt di Conc. N presupost ie nce n'acurdanza cun l Istitut Naziunel per l'Assistënza Soziela INPS/NISF, che ie al mumënt sun mëisa y che aspieta de unì sotscrita. "Riesc do scumencerons cun i paiamënc per la garejedes de servisc, da utober inant y, n paralel, uniràl paià ora aldò dla lista che ie śën cun lassù chiche toca de giapé i scioldi," à dit Burger.

Valurisazion per i prufii prufesciunei mpurtanc

L cuntrat culetif tol ite de ndut 21 articuli y renfurzea nce plu grupes prufesciuneles. Nscila crësc l suplemënt per l servisc de despunibltà da 11 nchin su al 30 percënt dl paiamënt de scumenciamënt. De chësc prufitea dantaldut i cunlauradëures dla Prutezion Zevila provinziela o de d'autra categuries che muessa nce vester njeniei a muever de nuet, ntan l fin dl'ena y i dis de feries. N aumënt sëuraprò dl 30 percënt dl paiamënt de scumenciamënt giaperà nce i esperc per la ntegrazion tl lëur, che sustën la persones cun handicap a jì ite ativamënter tl marcià dl lëur. L unirà nce metù su da nuef l prufil prufesciunel dl espert per la prevenzion dla viulënza te si lëur ambulant sun streda.