Plü segurëza te Val Badia: potenziamënt dles mosöres de proteziun

La Junta provinziala dá pro la variaziun dles carateristiches tecniches dl intervënt a San Martin de Tor, tl toch danter Longega e Picolin.

BALSAN/SAN LAURËNZ/MAREO/SAN MARTIN DE TOR (USP).

Ai 12 de jügn á la Junta provinziala aprové la mudaziun dles carateristiches tecniches dl secunt intervënt por mëte en segurëza la strada dla Val Badia. L’intervënt reverda le toch danter Longega y Picolin tl comun da San Martin de Tor. Les condiziuns geologiches te chël raiun porta pro che la strada vëgnes tres plü atocada da smöies y tomada de peres. Danter le 2021 y le 2023 él te chësc raiun tres indô gnü a s’al dé roes. Le bosch de proteziun incëria é ince gnü indeblí dal chefer.

“Por les strades jö te valada y sö por munt mëss la segurté dles porsones gní metüda al pröm post” sotrissëia l’assessur provinzial ala Mobilité y ales Infrastrotöres Daniel Alfreider. “Les conescënzes tecniches nöies desmostra che l’intervënt mëss gní planifiché te na manira plü mirada y sterscia. A chësta manira sconunse damí chi che transiëia vigni de sön chësta strada: pendleri, families y ghesć”.

L’intervënt se basëia sön inrescides geologiches, idrauliches y tecniches aprofondides. Chëstes á desmostré che i raiuns da mëte en segurëza é ciamó plü gragn y les mosöres de proteziun nezesciares é plü complesses co ci che an minâ tla pröma sciazada. Danter l’ater él preodü da instalé barieres de proteziun plü stersces cuntra la tomada de peres, mosöres cuntra les smöies y l’adeguamënt dles operes idrauliches.

“Les analises aprofondides á definí plü avisa le cheder di prighi”, spliga l’injinier Stefano Fox, responsabl dl proiet. “Les simulaziuns 3D y les analises idrauliches desmostra ch’al vá debojëgn de sistems de proteziun de maius dimenjiuns. L’obietif é sëgn chël da adaté indortöra i intervënc ales condiziuns reales dl raiun”.

Tl’aprofondimënt dl proiet vëgnel preodü incër 36 barieres cuntra la tomada de peres por na lunghëza de indöt 1.247 metri. Aladô dl toch, vál debojëgn de barieres cun na capazité da tigní sö energia danter 2.000 y 3.000 kilojoule, alüsc cina a 5.000 kilojoule, cun n’altëza danter i 4 y i 7 metri. Le bilanz é porchël gnü ajorné a 4 miliuns de euro. La curida finanziara vëgn garantida tl cheder dla programaziun preodüda.