Premiá i studënc dl Istitut tecnich economich dles Scores Altes La Ila

Suzes di studënc dl Istitut tecnich economich dles Scores Altes La Ila pro le concurs nazional «Salva la tua lingua locale» stlüt jö inier a Roma.

BAIA (USP). I studënc Edoardo Alfarei, Samuel Pizzinini, Mark Planinschek, Simon Irsara y Alberto Davare che frecuentëia la IV classa dl Istitut tecnich economich é gnüs premiá a Roma pro le concurs nazional «Salva la tua lingua locale», promoiü da UNPLI (Uniun Nazionala Pro Loco dla Talia) y ALI (Autonomies Locales por la Talia) en colaboraziun cun E.I.P. Talia Assoziaziun Scora Stromënt de Pesc.

Cun sües cianties metüdes jö por ladin “Rap Ladin” y “Identité Ladina” s’ái classifiché al secunt post tla seziun dla Musiga, portan sön paladina tröpa creativité y l’importanza da mantigní vi le lingaz dla uma. I dui toc de rap ti é plajüs ala iuria nia ma por la spligaziun y la freschëza di tesć, mo ince por la cura tl’esecuziun fata cun le clavier y la vidora.

N lalt spezial ti vá ince a Sara Frenademetz, dla medema classa, che á podü pié do na menziun d’onur tla seziun Prosa por le scrit “Ladins sunse nos” cun sües reflesciuns sön le svilup turistich.

“Le suzes de nüsc studënc y studëntes pro n concurs nazional desmostra tan via y creativa che nosta cultura ladina é. La combinaziun de tradiziun y inovaziun che vëgn fora dai proiec de chisc jogn, dai insegnanc y dai dirigënc, é n ejëmpl dla forza de nosta diversité linguistica. I sun contënt che la generaziun nöia se dais cun tröp impëgn por la conservaziun y la promoziun de nosc lingaz” á sotrissé le Vizepresidënt y assessur por l’Istruziun, la Formaziun y la Cultura ladina, Daniel Alfreider.

Aladô dl diretur dl Departimënt Scora y Cultura ladina, André Comploi, “porta chësc suzes n contribut de valüta al reconescimënt y ala valorisaziun de nosta cultura y de nosc lingaz ladin. Congratulaziuns ai studënc por so laur straordinar, n rengraziamënt particolar ala direturia dla scora Elena Pellegrini, ala dozënta referënta Magdalena Miribung y a düc i colaboradus che á acompagné y sostigní chisc mituns da talënt. Al nes gran plajëi da odëi ite che la scora é buna da renforzé ti jogn y tles jones l’amur por le lingaz dla uma y por les tröpes formes de espresciun artistica”.

Le pest «Salva la tua lingua locale» é n concurs leterar nazional metü sö tl 2013 por recordé le professur y linguist Tullio De Mauro, cun le fin da stravardé y valorisé i dialec y i lingac locai dla Talia.

La premiaziun por la seziun Scora é gnüda tignida ai 10 d’aurí tl Museum dles ziviltés, tl cuartier dl EUR, a Roma.