Scola ladina: Iscrizion tla graduatories nchin ai 20 de jené

L personal nseniant possa se scrì ite tla graduatories provinzieles y d’istitut dla scoles dla valedes ladines per l ann de scola 2023/24 nchin ai 20 de jené 2023.

La Ntendënza ladina fej al savëi che la dumandes per l’iscrizion tla graduatories provinzieles, tla graduatories d’istitut, per l’iscrizion cun riserva, per l ajurnamënt di ponc y per la mudazion di tituli de azes muessa unì dates ju al plu tert nchin la 12:00 di 20 de jené 2023 al Ufize Aministrazion scolastica dla Ntendënza ladina.

De plu nfurmazions sun la dumandes, la modaliteies per les dé ju y i formuleres ie da abiné online tla comunicazion dla Ntendënza ladina.

Per dumandes plu avisa possen cuntaté Claudia Aquilini per la scoles elementeres (tel. 0471 417015) y Anna Rudiferia per la scoles mesanes y autes (tel. 0471 417018).

La graduatories provinzieles y d’istitut provisores unirà apruvedes y publichedes sun la plata web dla Ntendënza ladina bonamënter ala fin de auril 2023, chëles definitives al scumenciamënt de juni 2023.