Servisc de trasport per i sculeies: terminn per dé ite ie inò daviert

La dumandes urdineres possa unì dates ju dai 15 nchin ai 29 de lugio – Regulamentazion de ezezion per gauja de deficulteies tecniches

BULSAN (USP). D'ansciuda pudova genitores y sculeies y sculées de majera età dé ju la dumanda per l servisc de trasport scolastich ndividualisà. Cun chësc sustën la Provinzia chëi sculeies y chëla sculées che ne possa nia se nuzé dl servisc de linia publica per ruvé te si scola, pervia che i sta massa dalonc. Per l ann de scola 2026/27 vëniel metù n droa per l prim iede plu nuviteies, coche l aumënt dla destanzia mëndra (da 1,5 a 2 chilometri) o la dumanda da pert dla families tres l portal myCivis.

Plu families se à bele d'ansciuda nunzià pra l Ufize per l'assistënza scolastica, auzan ora deficulteies tecniches. Per ti dé n mesun sëuraprò ala families che à la rejon de fé dumanda, iel ai 10 de lugio unì fat ora dala Jonta provinziela de Bulsan de fé valëi na regula de ezezion per na giaurida straurdinera dl terminn per dé ju la dumandes urdineres pervia de deficulteies tecniches per si servisc de trasport scolastich. "Servijes sciche l cuntribut per l servisc de trasport scolastich porta pro a ti dé l mesun nce a chiche sta plu dalonc dala strutures de furmazion zentreles de pudëi se nuzé de n servisc sun mesura che ti garantësce de ruvé permez. L ie perchël mpurtant che la families che à la rejon de giapé chësta prestazion se noze nce de chësta," nscila la paroles dl assessëur per la furmazion Philipp Achammer.

Mandé ite la dumandes nchin ai 29 de lugio

Tres la dezijion dla Jonta provinziela possa genitores o sculeies y sculées de majera età fé dumandes online tres myCIVIS tl tëmp da n mierculdi ai 15 de lugio nchin a n mierculdi ai 29 de lugio, sce dumandes ne n’ie nia ruvedes ite pervia de mpedimënc tecnics. Acioche l servisc posse unì metù a jì per tëmp y ëura tl scumenciamënt dl ann de scola nuef, dëssel unì dat ju la dumanda aldò al plu prësc.

Cun i 15 de lugio vëniel nce giaurì l mesun de dé ju dumandes straurdineres. Chëstes possa unì fates te caji de mudamënt de scola, de residënza o de luech de residënza o de d'autra gaujes ugetives; les ie da dé ju nchin al plu tert ai 29 de utober. Nce tlo vélel: plu abenëura che n fej la dumandes y plu abenëura che n possa mëter a jì l servisc.

La sënta zentrela de cuntat per dumandes n con' dl'autorisazion dl servisc de trasport scolastich ndividuel ie l Ufize per l'assistënza scolastica, l servisc vën metù su dal Ufize per l trasport de persones. Nfurmazions seuraprò possun abiné sun la plata internet www.provinz.bz.it/eigener-schuelerverkehrsdienst dai 15 de lugio inant.