Trafich, sanité y abité tl focus dles valades ladines

Govern provinzial ti raiuns (1/5): Le Govern Provizial y i ot ombolc debat a San Martin de Tor sön indesfidades zentrales dla Val Badia y de Gherdëna

SAN MARTIN DE TOR (LPA). Le Govern Provinzial dl Südtirol se á baraté fora ai 13 de otober tratan na sentada speziala a San Martin de Tor cun i ot ombolc dles valades ladines dl Südtirol. Tl zënter dla atenziun êl chestiuns zentrales dla Val Badia y de Gherdëna y la chestiun, sön co che an pó sostigní le svilup dles valades tres mosöres mirades y na colaboraziun strënta danter la Provinzia y i comuns.

La sentada é gnüda tignida tl cheder dla seria "Govern Provinzial y raiuns", cun chëra che le Govern Provinzial renforza en gaujiun dl pröm mez tëmp dla legislatöra 2023-2028 le dialogh diret cun i comuns y les rapresentanzes locales.

Sön l'ordin dl de êl de plü argomënc de importanza relevanta por la popolaziun y le svilup economich de trames les valades. Lapró aldîl la mobilité y la segurëza dla strada dla Val Badia. N ater punt zentral á revardé le dagní dles pices aziëndes de alberch o chëres mesanes y la chestiun de na surandada amosorada di lec. Implü él gnü tematisé la garanzia dla assistënza sanitara y di sorvisc de emergënza, la situaziun di doturs de ciasa sciöche ince le svilup inant dla assistënza sanitara dlungia i paisc de residënza. De atri punc de discusciun é stá les indesfidades tres plü granes da ti podëi pormez a n raiun abitatif y a terac da frabiché che an pó se pormëte por la popolaziun locala sciöche ince la situaziun personala dla polizia de comun.

 Le presidënt dla Junta Provinziala Arno Kompatscher á sotrissé la importanza de n barat diret cun i comuns: "Les chestiuns dla jënt sön le post mëss avëi na importanza zentrala te nostes dezijiuns. Les sentades speziales ti raiuns pita la poscibilité da debate sön les indesfidades concretes di singui raiuns diretamënter cun i responsabli sön le post. Propi te n raiun sciöche la Val Badia y Gherdëna él important da tigní cunt dles condiziuns de cornisc particolares a livel linguistich, geografich y economich." Ince i ombolc di comuns á rengrazié por le barat costrutif a San Martin de Tor. I dui ombolt Felix Nagler (La Val) y Tobias Nockler (Selva) á rengrazié a inom de düc i ombolc. Deboriada él gnü lauré sön les soluziuns por l'assistënza sanitara tles valades o por le trafich sön les strades di jus.