![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Troi dala roda Rodaval: l puent nuef cunlieia Santa Cristina y Sëlva
Strutura giaurida da n'ena incà: l ie unì cumpletà n cunliamënt dala roda strategich te Gherdëina. Sëuraluech de Alfreider y Catalano. L lëur ie unì sustenì dal MIT.
S. CRISTINA/SËLVA GHERDËINA (USP). Da zirca n'ena incà ie l puent nuef per l troi dala roda Rodaval, tl tòch Larjac-Ruacia danter Santa Cristina y Sëlva de Gherdëina, daviert al trafich. La strutura a archët, cun na lum de ntëur a 85 metri, cunlieia la doi pertes dla valeda y lascia pro che chëi che va a pe y cun la roda posse resté y jì inant sun l troi dala roda, schivan nscila la stredes prinzipeles. L assessëur provinziel per la Nfrastrutures y la Mubltà Daniel Alfreider à fat n sëuraluech deberieda cun Giuseppe Catalano, che à manejà l iter de sëurandé i finanziamënc, te si funzion a cë dla strutura tecnica de miscion dl Ministere dla Nfrastrutures y di Trasporc al mumënt dla prugramazion PNRR.
La vijita ie stata l'ucajion per cuntrulé danman l resultat dl nvestimënt y cuntrulé che i lëures per la streda dala roda Rodaval sibe unii fai a puntin y che i ie finei via. Catalano à dit che l se trata de „na pruposta inuvativa a livel naziunel y nternaziunel. L assessëur Alfreider sotrissea: „Cun chësc puent vëniel tëut demez na gran nteruzion dla rë di troies dala rodes de Gherdëina. L cunliamënt nuef,“ njonta Alfreider, „miurea la segurëza y fej deventé la roda na auternativa plu cuncreta sibe per i muvimënc da uni di danter i chemuns dla valeda che per l tëmp liede y l turism. L ie nce n ejëmpl de coche pruiec njeniei ca a puntin y na cunlaurazion efiziënta cun l Ministere lasce pro de purté sun l raion de gran finanziamënc statei.“
N cunliamënt tres duta Gherdëina
L troi dala roda Rodaval ie unì svilupà da pert dla Cumenanza raiunela Salten-Scilier, cun l mpëni di Chemuns nteressei. L percurs passa tres Gherdëina, da Puntives ite de viers de Sëlva. Tres i ultimi cunliamënc pòssel unì jì cun la roda zënza nteruzion, da Runcadic nchin te Plan. L lot Larjac- Ruacia tol ite, dlongia l puent, l asfaltamënt de zirca 900 metri de troi che ie bele y la realisazion de n tòch dala rodes nuef de zirca 170 metri, che va do la trassa che ie bele y che porta ala strutura nueva, cun n deslivel de zirca diesc metri.
Da coche l vën auzà ora da pert dl Departimënt Nfrastrutures y Mubltà, possa n puent a archët passé tres la valeda cun na strutura lesiera y da recunëscer, penseda per jì ite te na maniera armonica tla cuntreda. L cunliamënt nuef smendrësc nce la prejënza dla rodes sun la stredes daviertes al trafich y miurea la cuntinuità de duta la rë dla rodes de Gherdëina.
Deplü informaziuns
L sustëni dl Ministere dla Nfrastrutures y di Trasporc
Per finé l ultimò tòch dla Rodaval iel unì dat n sustëni de 4.833.000 euro de scioldi dl Stat, metui a despusizion dal Ministere dla Nfrastrutures y di Trasporc. I mesuns ie unii sëurandac tres l decret ministerel di 28 de utober dl 2024, nr. 257. L pruvedimënt ti destinea de ndut 13,4 milions de euro ala Provinzia Autonoma de Bulsan per cater pruiec priuriteres de slargiamënt y cumpletamënt dla rë di troies dala rodes de Südtirol.
„La giaurida dl puent mostra cuncretamënter coche i finanziamënc naziunei posse se trasfurmé te nfrastrutures che ti joa ala cumenanza,“ dij Catalano. „L cunfront danter Ministere, Provinzia y istituzions dl luech à purtà pro a sustenì n pruiet bele madur y bon de miuré la mubltà y la segurëza sun n cunliamënt mpurtant de Gherdëina.“
La Cumenanza raiunela Salten-Scilier ie l sujet che mët a jì l pruiet Rodaval y l benefizier dl finanziamënt. L ntervënt sustenì dal decret ministerel nteressea de ndut 2,5 chilometri de troi dala roda.
„La cunlaurazion costrutiva cun la Repartizion Mubltà dla Provinzia nes à lascià pro de mëter a jì ti ultimi ani plu pruiec al'avanverda per na mubltà sustenibla y segura te nosc raion,“ à dit l presidënt dla Cumenanza raiunela Salten-Scilier Albin Kofler. „N rengraziamënt particuler ti va a nosc cunlauradëures, che acumpanieia tresora chisc pruiec, dala fasa de pruietazion nchin a chëla de bandida de garejeda y de realisazion di lëures, cun gran cumpetënza y gran mpëni. Cun l finé via di ultimi doi tòc dl troi dala rodes Rodaval te Gherdëina vëniel śën mplenì na gran locia te nosta rë de troies dala roda, n var fundamentel per na mubltà dala rodes segura te Gherdëina,“ da coche Kofler à juntà pro. „D'autonn,“ nscila for Kofler, „ti uniràl deberieda cun l assessëur provinziel Alfreider sëurandat cun solenità la trassa dla rodes Rodaval, śën ntiera, ai Chemuns, a si populazion y a si ghesć.“
gm/red
