Zircumvalazion de Sëlva: l ie unì definì la carateristiches di lëures

N pruiet da 97 milions de euro per smendré l trafich tl zënter abità y miuré la cualità dla mubltà te Gherdëina. Alfreider: “Lëures che va debujën per miuré la mubltà.”

BULSAN (USP). Tla senteda de n vënderdi ai 20 de merz à la Jonta provinziela dat pro la carateristiches tecniches y l cheder ecunomich dla zircumvalazion de Sëlva per la streda statela de Gherdëina y dl Jëuf de Sela (SS242). L se trata de n ntervënt strategich per smendré l trafich tl zënter abità, che ie scialdi grant dantaldut sibe tla sajon da d’inviern che te chëla da d’instà.

L pruiet prevëija la realisazion de na trassa nueva a sud dl raion abità, cun doi tuniei un ndolauter y trëi puenc per la lueges da unì ora “Zënter”, “Est” y “Ovest”. La nfrastrutura lascerà pro de despartì l trafich che passa via da chël che se muev tl luech, miuran la cualità de vita tl luech y la segurëza sun streda.

“Cun chësta dezijion metons su la fundamënta per n pruiet mpurtant. L se trata de lëures che ie debujën per smendré l trafich tl zënter abità y miuré la mubltà,” à sotrissà l assessëur provinziel per la Nfrastrutures y la Mubltà Daniel Alfreider, che à fat la pruposta dla delibera. “Cialon śën nce de abiné ca n cufinanziamënt puscibl de viers di Mundiei de Schi dl 2031 te Gherdëina,” à njuntà Alfreider.

Tl detail scumëncia la trassa dala SS242 y unirà cunlieda ala viabltà che l ie bele tres n rundel nuef. Do che la traversea l Derjon cun n puent de zirca 71 metri va la streda ite tl prim tunel “La Sëlva”, de za. 591 metri, per se taché pona ite al zënter abità y jì inant te n segondo tunel “Ciampinëi” de zirca 801 metri nchin ala luegia de unì ora est.

Dala verifiches geologiches fates via per l ann 2025 iel unit ora che l ntervënt possa unì fat da chësc pont de ududa, lascian śën pro de jì inant cun la proscima fasa pruietuela, plu avisa l pruiet de fatibltà tecnich-ecunomica.

L custimënt dut adum vën ratà de 97 milions de euro, de chisc zirca 66,6 milions de euro per i lëures y zirca 30,4 milions per somes a despusizion dl’aministrazion, tlo laite iel l’IVA, paiamënc per la pert tecnica, ntraunides nia preududes y d’autri ntervënc cumplementeres.

L ntervënt ie bele unì metù ite ti documënc de prugramazion provinziela 2026–2028 y va ite tla planificazion nfrastruturela dl raion, cun la finamira de miuré la cualità dla mubltà y la cualità de vita dl luech turistich de Südtirol.